Son mövsümdə bir çoxlarını təəccübləndirərək Konfrans Liqasına vəsiqə qazanan “Qəbələ” artıq hazırlığa başlayıb.

Elmar Baxşıyevin komandası toplanışın ilk mərhələsini doğma rayonda keçirirsə, ikinci mərhələ üçün Türkiyəyə yollanacaq.

Toplanış necə keçir, transfer çalışmaları nə yerdədi, Konfrans Liqsının 2-ci mərhələsində rəqib olacaq “Fehervar” barədə hansı informasiyaya malikdilər?

Bu və başqa suallara aydınlıq gətirmək üçün bölgə təmsilçisinin baş meneceri Nail Kərimovu aradıq.

- Yayılan söz-söhbətə görə, komanda məşqlərə başlasa da, yeni transferləriniz – İlkin Qırtımov, Səlahət Ağayev və Felipe Santos hazırlığa qoşulmayıb. Bunun səbəbini bilmək istərdik.

- İlkin Qırtımov ilk gündən komanda ilə bir yerdədi və toplanışda iştirak edir. Səlahət Ağayev yığmanın düşərgəsində olduğu üçün icazəli idi. Ancaq o da iyunun 18-dən kollektiv məşqlərə qatılır. U-21-də olan Rüfət Əhmədzadə ilə Emil Səfərov isə bu gündən Elmar Baxşıyevin sərəncamındadı. Felipe Santosa gəlincə, braziliyalı iyunun 24-də Bakıda olacaq və ondan sonra məşqlərə qatılacaq.

- Fernan Lopesin “Qəbələ”dən ayrılacağı artıq dəqiqləşib. Stefan Vukçeviçin isə düşərgəyə dönmək istəmədiyi ilə bağlı söz-söhbətlər dolaşır. Monteneqrolu yarımmüdafiəçi ilə danışıqlar nə yerdədi?

- Stefanla danışıqlar davam edir. Həmçinin həmin mövqeyə yeni oyunçu axtarışımızı sürdürürük. Yaxın 4-5 gündə bu məsələyə nöqtə qoyulacaq.

- Qış fasiləsində icarə əsasında heyətə qatdığız Patrik Robson qalır, yoxsa onu da göndərirsiz?

- Braziliyalı ilə anlaşmanı pozmaq fikrindəyik. Bu barədə özü ilə danışırıq. Özü də “Qəbələ”dən getmək istəyir. Yaxşı futbolçudu, ancaq burda alınmadı. Özünü göstərə biləcəyi kluba getmək istəyir. İndi danışıqlar davam edir. Bu mərhələni yekunlaşdıran kimi ictimaiyyətə məlumat verəcəyik.

- Felipedən başqa maraq dairənizə düşən legionerlər var? Varsa, onlar hansı mövqenin oyunçularıdı və haranı təmsil edirlər?

- Felipedən başqa bir hücumameyilli və bir nəfər də dayaq yarımmüdafiəçi mövqeyində oynayan futbolçulara baxırıq. Onlardan başqa heç kimlə maraqlanmırıq. Maraq dairəmizə düşənlər fərqli ölkələrdən olduqlarına görə bu barədə konkret fikir bildirmək istəmirəm. Təklif olunan futbolçular arasında bizə münasib olanı nəzərdən keçiririk.

- Konfrans Liqasında rəqibiniz olacaq “Fehervar” barədə məlumat toplamısız?

- Macarıstan klubu haqda tam dolğun, dəqiq məlumatımız yoxdu. Niyə? Hələ də onları öyrənir, informasiya toplamağa çalışırıq. İlk qarşılaşama gününə qədər yetərincə vaxtımız var. Fikrimcə, məşqçilər korpusu “Fehrvar”ı təhlil edəcək və buna uyğun da komanda oyuna hazırlaşacaq.

- Sizə elə gəlmir ki, Macarıstan təmsilçisinin rəhbərliyi püşk onların qarşısına “Qəbələ”ni çıxardığına görə sevinir? Bunu mətbuata verdikləri açıqlamalardan hiss etmək mümkündü...

- “Fehervar” rəsmilərinin sevinməsindən xəbərim yoxdu. Niyə sevinirlər, səbəb nədi, deyə bilmərəm. Yalnız onu söyləyə bilərəm ki, Qərbi Avropa klubları üçün belə səfərlər heç də xoş olmur. Onlar daha çox yaxın ölkələrin klubları ilə qarşılaşmaq istəyirlər. Əvvəlki avrokubok oyunlarımızda bunu dəfələrlə rəqiblərdən eşitmişik. Onlar üçün uzaq səfərlər bir qədər narahatlıq yaradır. Yəni təşkilati cəhətdən sevindiklərinə inanmıram. Ola bilər, bizi zəif rəqib hesab saydıqlarından bir qədər rahatdılar. Ancaq “Qəbələ” də dəfələrlə favorit komandaları üstələməyi bacardığını göstərib. İndi də cütün favoriti, heç şübhəsiz, Macarıstan klubudu. Biz isə hər şeydən əvvəl uğur qazanacağımıza inanaraq, matça hazırlaşırıq. Çempionatın istər əvvəlində, istərsə də gedişində bizdən üstün görünən komandalar olub. Onları geridə qoymağı bacarmışıqsa, niyə də indi eyni uğuru təkrarlamayaq, növbəti mərhələyə yüksələn tərəf olmayaq?!

RƏŞAD