Ölkəmizi Konfrans Liqasında təmsil edəcək “Qəbələ” hazırlığa start verib.

“Qırmızı-qaralar” mövsümlərarası fasilədə istirahəti başa vuraraq Qəbələdə bir araya gəlib. Ötən gün komanda istirahətdən sonra ikinci məşqə çıxıb. Baş məşqçi Elmar Baxşıyevin rəhbərliyi altında keçən hazırlıq prosesi fiziki təmrinlərlə başlayıb. Futbolçular məşqi toplu və topsuz çalışmalarla davam etdirib.
İyulun 3-də Türkiyəyə yollanacaq “qırmızı-qaralar” Boludakı “Termal” otelində məskunlaşacaq. Ayın 13-dək davam edəcək hazırlıq çərçivəsində iki yoxlama matçının keçirilməsi planlaşdırılır. Təmsilçimiz iyulun 5-də “Qaziantep”, 12-də isə Rumıniya “Çiksereda”sı ilə üz-üzə gələcək.

Bu arada bölgə təəmsilçisi heyətinə daha bir legioner qatıb. Söhbət Felipe Santosdan gedir. 25 yaşlı futbolçu ilə “1+1” illik müqavilə bağlanıb. Braziliyalı ötən mövsüm “Şamaxı”nın formasını geyib və premyer-liqada 21 oyunda 6 dəfə adını tabloya yazdırıb. O, buna qədər Braziliyada “Paulista” (2014-16), Sloveniyada “Ankaran Hrvatini” (2017-18) və “Maribor”da (2018-21) çıxış edib.
Qeyd edək ki, “Qəbələ” daha öncə İlkin Qırtımovla Səlahət Ağayevi “rənglərinə bağlayıb”.

RƏŞAD