2022/23 mövsümündə ölkəmizi avrokuboklarda təmsil edəcək klublardan biri də “Qəbələ”di.

Bölgə təmsilçisi lider kimi başladığı mövsümü çətinliklə 4-cü pillədə bitirərək Konfrans Liqasında iştirak hüququ qazandı. “Qırmızı-qaralar” bunun üçün müvafiq işlər görməyə də başlayıb. İsnik Alimi, Kristof Atanqana, Yaovi Akakpo, Ruan Renato ilə müqavilə yenilənibsə, əsas heyətdə özünə yer tapa bilməyən Samet Karakoçla yollar ayrılıb. Elmar Baxşıyev Konfrans Liqasında uğurlu nəticə qazanmaq üçün əvvəlcə “Şamaxı”dan İlkin Qırtımovu heyətə qatmağı lazım bildi. Bir neçə gün öncə isə “Sabah”la başa çatan müqaviləsini yeniləməyən Səlahət Ağayevin “Qəbələ”yə keçidi rəsmiləşdi. Bölgə təmsilçisinin qarşıdakı planlarını öyrənmək üçün Elmar Baxşıyevlə danışdıq.

- Yeni mövsümə hazırlıq üçün nə vaxt bir araya gəlməyi düşünürsüz?

- İyunun 15-də Qəbələdə təlim-məşq toplanışına başlayacağıq. Doğma məkanda hazırlıq prosesi iki həftə nəzərdə tutulub.

- Toplanışın ikinci mərhələsi harda olacaq? Ölkə xaricinə yollanacaqsız, yoxsa burda qalaraq Konfrans Liqasına hazırlığı davam etdirəcəksiz?

- Qəbələdən sonra planda Türkiyədə toplanış keçmək var. Sadəcə, bir-iki detal qalıb. Onun üzərində müzakirələr gedir. Böyük ehtimalla hazırlıq prosesinin davamı Türkiyədə olacaq.

- Hələ ki ancaq müdafiəyə İlkin Qırtımov və qapı xəttinə Səlahət Ağayev cəlb olunub. Hər ikisi yetərincə təcrübəyə malik futbolçudu. Bu keçidləri özünüz istəmisiz?

- Təbii ki, hər iki futbolçunun təcrübəsi və istedadı hamıya bəllidi. Mənim istəyimlə transfer ediliblər.

- Nicat Mehbalıyevin aqibəti necə olacaq? Qolkiper bir neçə dəfə “Qəbələ”də qalmaq istədiyini bildirib. Ancaq yəqin ki, Səlahətin keçidi bu varinatı arxa plana atır...

- Nicat müqavilə ilə “Sabah”a məxsusdu. Bir az gözləməli olacaqdıq. Ona görə də Səlahətin üzərində dayandıq. Onun Masazır təmsilçisi ilə müqaviləsinin müddəti başa çatdı. Daha uyğun olduğuna qərar verdik. Nicat isə artıq “Qəbələ”dən ayrılıb.

- Əsasən heyətdə olan futbolçularla müqavilələri yeniləməyi lazım bildiz. Ayrılanlar olacaq?

- Hamı görür və bilirdi ki, heyətimiz o qədər də geniş deyil. Sadəcə, bu kollektivi qorumağın üzərində dayandıq. Əlbəttə, yeni oyunçu axtarışımız davam edir. Daha da güclənməyə ehtiyac var.

- Daha çox yerli, yoxsa legioner futbolçu transferinə üstünlük verəcəksiz?

- Yaxşı yerli futbolçu variantı olacaqsa, onun üzərində dayanacağıq. Olmaycaqsa, məcburən əcnəbi oyunçu transfer edəcəyik. “Sırf yerli və ya legioner olsun” deyə seçim etmirik. Konkret mövqelər üzrə hansı futbolçu komandanı daha da gücləndirəcəksə, onu heyətə qatacağıq.

- Bəzi mənbələrdə Rusiya və Ukrayna çempionatından çox sayda futbolçunun avrokuboklarda iştirak edəcək klublarımıza təklif olunduğu deyilir. “Qəbələ”yə necə, adı çəkilən liqalardan futbolçular təklif edilib?

- Sırf avrokubok üçün yox, gücümüzə güc qatacaq futbolçular ilə maraqlanırıq. Bir-iki oyunluq oyunçu istəmirik. Növbəti mövsüm üçün komandanı daha yaxşı formalaşdırmaq istəyirik.

- Urfan Abbasovun əməliyyatdan sonra bərpa prosesi necə gedir?

- Yaxşı hiss edir. Amma onun sağalması uzun çəkəcək. Ağır əməliyyat idi. Urfanın dönüşü 3-4 aydan tez olmayacaq.

- Son günlər hər kəsin diqqəti millinin üzərindədi. Səfərdə Qazaxıstana 0:2 hesabı ilə yenildiksə, Belarusla qolsuz bərabərliyə razılaşdıq. Yığmanın hazırkı durumu ilə bağlı nə deyə bilərsiz?

- Ümumilikdə hər iki oyunda qələbə qazana bilərdik. Əlbəttə, qol vurmasan, qalib gələ bilməyəcəksən. Hiss olunur ki, komanda imkanları dəyərləndirməkdə əziyyət çəkir. Yığmaya inanmaq lazımdı, o hamımızındı.

SƏNƏM FƏRHADOVA