Futbolçularımızın ölkə xaricində çıxış etməsinə nadir hallarda rast gəlirik.

Rast gəldiyimiz təqdirdə də bu xoşbəxtlik uzun çəkmir. Belə ki, onlara ən yaxşı halda 1 il legioner həyatı yaşamaq nəsib olur. Nümunə kimi Vüsal İsgəndərlini, Namik Ələskərovu, artıq Qazaxıstan "Turan"ından ayrıldığı deyilən Emil Balayevi göstərmək mümkündü. Futbolçularımızın legioner həyatındakı uğursuzluğu ilə bağlı futbol menecerlərinin fikirlərini öyrəndik.

Səbuhi Səfiyarlı: "Emil Balayevin və digər futbolçularımızın legioner həyatındakı uğursuzluqlar haqda danışa bilmərəm. Çünki onların meneceri deyiləm. Amma istənilən futbolçunun ölkə xaricində karyerası uğursuzluqla nəticələnirsə, bunun obyektiv və subyektiv səbəbləri var. Düşünürəm ki, futbolçuların da özlərinə görə səbəbləri var. Həmçinin bu yay transferi dönəmində hansısa oyunçunun ölkə xaricinə yollanmasını gözləmirəm. Çünki çempionatımızda komanda sayı artıb".

Vaqif Heydərli: "Futbolçularımızın ölkə xaricində karyeralarının uğursuzluğunun səbəbi hərədə fərqlidi. Kimi maliyyə, kimi ailə, kimi də çempionatın səviyyəsindən razı olmamaq kimi məsələlərə görə karyerasında dalana dirənir. Amma Namik Ələskərovda məsələ nə maddiyyat, nə də mental səbəblərə görə idi. Onu bəxtsizliklə əlaqələndirsəm, daha məntiqlidi. Futbolçumuz "Bursaspor"da 33 oyuna çıxdı, 6 qol və 6 məhsuldar ötürmə ilə yadda qaldı. Bu, Türkiyənin 1-ci liqasında yaxşı göstəricidi. Sadəcə, "Bursaspor"un 2-ci liqaya düşməsi və həmin çempionatda legioner futbolçuların çıxışına icazə verilməməsi Namikin karyerasında böyük əngəl yaratdı.Türkiyənin 1-ci liqası daha çox azad agent statuslu futbolçuları sıralarına qatmaqda maraqlıdı. Onun da "timsahlar"la müqaviləsi olduğundan maraqlanan klublar əlavə ödəniş etmək istəmədilər. Türkiyəli seleksiyaçıların futbolçularımıza maraq göstərməməsinin səbəblərindən biri də ölkə çempionatında çıxış edənlərin əksəriyyətinin azad agent statusunda olmamasıdı".

Erkin İbrahimov: "Futbolçularımızın legioner karyerasında uğursuzluğunun səbəbləri çoxdu. Bu haqda saatlarla, günlərlə, həftələrlə danışsaq, bitməz. Amma düşünürəm ki, xaricə futbolçu ixrac etmək istəyiriksə, siyasətimizi, baxışımızı dəyişməliyik.Gənc futbolçuların legioner həyatı yaşamasında maraqlı olmalıyıq. Çempionatımızda U-21 limitinin götürülməsinin də buna stimul verəcəyini düşünürəm".
Tural Əsgərov: "Legioner həyatı yaşamaq iki cür olur: 1. Gənc yaşlarında ölkə xaricinə yollanıb orda top qovub parlamaq. 2. Öz ölkəsində yetərincə oynayıb, daha çox qazanmaq üçün legioner həyatına qədəm qoymaq. Azərbaycan premyer-liqasının səviyyəsi yüksək olmadığından əcnəbi skautlar gənc futbolçularımızı izləməkdə maraqlı deyil. Ona görə bizdə 2-ci səbəb üzündən ölkə xaricinə üz tutanlar var. Xarici çempionatlarda da futbolçularımızdan yüksək performans, nəticə tələb edəndə iş tərs gətirir. Çünki mütləq əksəriyyətinin fiziki, mənəvi hazırlığı daha səviyyəli liqalarda çıxış etməyə imkan vermir. Legioner həyatı yaşamaq əyləncə deyil. Ona görə də ölkə xaricinə hazırlıqlı, nəticə verən futbolçular getməlidi. Biz futbolçularımızın legioner həyatındakı uğursuzluqlarını bəxtsizliyə, şanssızlığa bağlamağa öyrəşmişik. Bunların hamısı bəhanədi. Necə olur ki, 90-cı illərdə bütün çətinliklərə rəğmən, Nazim Süleymanov, Qurban Qurbanov, Kamal Quliyev və başqaları uğurlu legioner həyatı yaşaya bilirdi, indi daha şəraitli mühit olmasına baxmayaraq, xaricə futbolçu ixracı yoxdu? Bir daha təkrar edirəm, ölkə xaricində oynayacaq potensialda futbolçularımız yox dərəcəsindədi. Xaricdə hansısa futbolçu bir liqada oynayırsa, onun mütləq 5-6 müştərisi olan klub var. Nəinki Vüsal İsgəndərli, Namik Ələskərov, Emil Balayev, hətta Mahir Emreli də sabah ölkəyə qayıtsa, zərrəcə təəccüblənməyəcəm".

ABDULLA İSMAYILOĞLU