2014-cü ilin dekabrında Emil Balayev Almaniyanın "Ayntraxt" klubuyla müqavilə bağlayanda çox sevindik.

Düşündük ki, onun adlı-sanlı kluba transferi sayəsində Avropada səviyyəli qapıçımızla öyünəcəyik. Amma böyük ümidlər bəslənilən Emil Almaniyanın 123 yaşlı klubunda 1 rəsmi oyunda belə şans qazanmadan vətənə qayıtdı və bir müddət klubsuz qaldı. Gənc qapıçını "Qarabağ" himayəsinə götürsə də, şans qazanmadı. Nəhayət, 2017-ci ildə Emil "Səbail"ə keçdi. "Dənizçilər"in heyətində özünü yaxşı tərəfdən göstərə bildi. Burda keçirdiyi 2 il ərzində 38 oyunda meydana çıxaraq, qapısında 42 qol gördü.

2019-cu ildə Emil yenidən legioner həyatı yaşamaq qərarına gəldi və Qazaxıstan "Tobol"una transfer olundu. Adı çəkilən komandada uğurlu mövsüm keçirdi, hətta 736 dəqiqə qapısını toxunulmaz saxlamaqla Qazaxıstan çempionatı tarixinə ən uzun “quru” seriyaya malik 5-ci qapıçı kimi düşdü. Lakin 2020-də Vardan Minasyanın "Tobol"un “sükanı arxasına” keçməsiylə Emilin legioner həyatı dalana dirəndi. Qolkiper erməni məşqçinin rəhbərliyi altında oynamağı özünə sığışdırmayaraq klubdan ayrılıb, "Zirə"yə keçdi. Qapıçı burda da uğursuzluğa düçar oldu. Belə ki, o, "qartallar"ın heyətində cəmi 1 oyunda şans qazandı. Koronavirus pandemiyasına görə ölkə çempionatı yarımçıq qaldı. Yeni mövsümdə "Qarabağ"a keçən Emil burda da özünü doğrulda bilmədi. Əlcək sahibi "köhlən atlar"ın heyətində rəqabətdə uduzdu. 2 ilə yaxın Ağdam təmsilçisinin heyətində keçirən Emil 19 oyunda şans qazanıb, qapısından 12 top buraxdı. 2022-nin martında Qazaxıstan "Turan"ı ilə anlaşan qolkiper yola saldığımız 5 ay ərzində cəmi 1 oyunda şans qazandı. İndi isə onun adı çəkilən klubdan ayrılacağı, 3-cü dəfə legioner həyatında burulğana düşəcəyi deyilir.

Bütün bu sadalananlardan sonra ortaya sual çıxır: Emil Balayev Qazaxıstana çempionatına 1 oyun keçirmək üçün yollanmışdı? Çoxları buna "Emil yaxşı qapıçıdı, sadəcə, yenə bəxti gətirmədi" cavabı verir. Məşhur bir deyim var: "Bir oğru səni ilk dəfə soyursa, bu onun günahıdı. Səndən ikinci dəfə nəsə oğurlayırsa, bu artıq sənin günahındı". Karyerasında ardıcıl uğursuzsuqlar yaşayan Emil niyə bundan dərs çıxarmadı? Cəmi 1 oyun meydanda gəzişmək və ya protokola düşmək üçün legioner həyatı yaşamaq belə vacib idi? Həqiqətən legioner həyatı yaşamaqda qərarlıydısa, Belarus, Finlandiya, Türkiyənin 1-ci liqası, Albaniya, Şimali Makedoniya, Xorvatiya, Serbiya, Baltikyanı və sair ölkələrin çempionatlarında uğurlu mövsüm keçirib, sonra daha səviyyəli liqalara keçmək prinsipi üzərində dayanmaq olmazdı? Ölkə xaricində özünü doğrulda bilməyəcəkdinsə, premyer-liqada "Şamaxı", "Kəpəz", "Turan", "Səbail" kimi komandalar sənin xidmətində maraqlıydı və onlardan birinin heyətində rahat "1 nömrə"yə çevrilə biləcəyin halda, niyə özünü dağa-daşa salıb Qazaxıstana yollandın? Həm ümidlərin puç oldu, həm də qızıl vaxtını itirdin. Pol Skoulz deyir: "Ünvanıma tərif səsləndirilməsini sevmirəm. Tənqidlər eşitməyə üstünlük verirəm və onların əksini göstəməkdə maraqlıyam". Oliver Kan vurğulayır: "Qapıçı təxminən 30, daha dəqiqi, 32 yaşında tam formalaşır. Bundan tez mümkün deyil”.

Emil Balayevlə bağlı hadisələrin axarı göstərir ki, 28 yaşlı qapıçı tənqidlərdən nəticə çıxarmır. Belə olan halda isə 30-32 yaşında o, tam formalaşmaq əvəzinə karyerasını bitirəcək.

Yeri gəlmişkən...

Həftəsonu Qazaxıstan premyer-liqasında 14-cü turun oyunları keçirilib. Emil Balayevin şərəfini qoruduğu “Turan” doğma meydanda “Akjayık”la heç-heçə edib – 1:1. Millinin qapıçısı sona qədər ehtiyatda qalıb. Hesabında 12 xal olan “Turan” 14 komanda arasında 12-ci pillədə qərarlaşıb.

ABDULLA İSMAYILOĞLU