Mövsüm bitəndən sonra bir neçə tanınmış futbolçu komandasız qaldı.

“Səbail”dən ayrılandan sonra karyerasını başa vurmaq ehtimalı olan Əfran İsmayılov, Türkiyənin “Keçiörəngücü” klubundan ayrılan Vüsal İsgəndərli, “Səbail”in komandadan göndərdiyi futbolçulardan biri olan Rauf Əliyev qeyri-müəyyənlər sırasındadı. Ötən mövsüm “Kəpəz”in heyətində çıxış edən İbrahim Qədirzadənin də hansı kluba keçəcəyi bilinmir. Bunu nəzərə alıb, adı çəkilən futbolçularla əlaqə saxladıq, yenilik olub-olmadığını öyrəndik.

Vüsal İsgəndərli: “Klubun adını demək düzgün olmaz. Amma hansı klubla müqavilə bağladığım, inşallah, ya bu gün, ya da sabah rəsmiləşəcək. Hazırda danışıqlar davam edir”.

Əfran İsmayılov: “Bu məsələ bir az uzanıb. Yəqin bir-iki həftəyə dəqiq bilinəcək. Hazırda danışıqlar gedir. Ola bilər ki, daha oynamaq söhbəti qurtarsın. Amma davam da edə bilərəm. Özüm də variantları fikirləşib qərar verməliyəm. Ondan sonra sizə məlumat verəcəm”.

İbrahim Qədirzadə ilə danışa bilməsək də, meneceri Vaqif Heydərlidən məsələ ilə bağlı açıqlama aldıq: “Birinci divizion klublarından maraqlananlar var. Böyük ehtimalla yaxın günlərdə müqavilə bağlayacaq”.

ŞAİR ABDULLA