Konfrans Liqasında çıxış edəcək "Zirə" dünən BOS-da təlim-məşq toplanışına start verdi.

Toplanışın ilk mərhələsi Bakıda, ikinci mərhələsi isə ölkə xaricində olacaq.

"Qartallar"ın əsas məqsədi ötən mövsüm komandanın uğurları üçün çalışan heyətin özəyini qorumaqdı. Hələ ki "Zirə"ni kapitan Ağabala Ramazanovla David Volkov tərk edib. Kapitanın ayrılacağını gözləmək olardı. Forvard ötən mövsüm 21 oyunda 1382 dəqiqə (6 matçda əvəzlənmədən meydanda olub) şans qazanaraq, 3 qolla yadda qalıb. Bu göstərici həm hücumcu, həm də komandanın liderlərindən sayılan futbolçu üçün zəif göstəricidi. Amma "qartallar"ın və premyer-liqanın bombardirlərindən olan Davit Volkovun komandanı tərk etməsi böyük itkidi. Gürcü başa çatan mövsümdə 28 oyunda 2126 dəqiqə (22 görüşdə 90 dəqiqə oynayıb) meydanda olmaqla 11 qol vurub. Onun xarici klublardan təklif aldığı söylənilsə də, "Sabah"a keçməyi üstün tutdu. Hücumçu növbəti 2 ildə "bayquşlar"ın formasını geyəcək.

Gedənlərlə yanaşı, qəsəbə təmsilçisi ilk transferlərini də həyata keçirib. Slavik Alxasovla 2, Mirsayib Abbasovla 1 illik müqavilə bağlanıb. Yeni transferlər yola saldığımız mövsümdə heç də uğurlu çıxışla seçilməyiblər. Belə ki, 29 yaşlı Alxasov "Sabah"ın heyətində 15 oyunda 988 dəqiqə meydanda olub. 20-ci turdan sonra isə meydana həsrət qalıb. "Sabah"ın "14 nömrə"siylə həmyaşıd olan Mirsayib isə "Səbail"in heyətində 21 oyunda 1408 dəqiqə keçirməklə 1 qol vurub. "Dənizçilər"in "7 nömrə"si son çempion "Qarabağ"ın mövsümdə yeganə məğlub olduğu 8-ci turun matçında fərqlənib. Hücumçunun əsas vəzifəsindən birinin qol vurmaq olduğunu nəzərə alsaq, bu heç də yaxşı göstərici deyil.

Hazırda "Zirə"də ən problemli mövqe hücum xəttidi. Ağabala Ramazanovla David Volkovun gedişini, Filipe Paxtmanın uzun müddətdi zədədən əziyyət çəkdiyini nəzərə alsaq, komandada forvard yoxdu. Avrokuboka hazırlaşan, həmçinin növbəti mövsüm çempionluğu hədəfləyən "qartallar"ın oyun təcrübəsindən əziyyət çəkən, matçın taleyini dəyişə biləcək potensialda olmayan Mirsayibi transfer etməsi təəccüblüdü. Bundansa, David Volkovu razı salıb, komandada saxlamaq daha yaxşı olardı. "Qarabağ"lı futbolçuların qəsəbə təmsilçisində icarədə oynaması ənənəyə çevrilibsə, əsas heyətə düşməkdə çətinlik çəkən Rüstəm Əhmədzadənin ən azı 6 aylığa keçidini də rəsmləşdirmək mümkün idi. “Sabah”dan ayrılan Xulio Sezar Rodriges də var.

İnanmaq istərdik ki, “Zirə” qarşıdakı günlərdə boşluqları daha sanballı futbolçuların transferi ilə aradan qaldıracaq. Komandanın üç “cəbhə”də mübarizə aparması bunu qaçılmaz edir. Geniş və keyfiyyətli oyunçulardan ibarət heyət, mütləq ki, uzun marafonda iddialı Rəşad Sadıqovun işinə yarayacaq.

ABDULLA İSMAYILOĞLU