Madridlilər “Çelsi”nin problemlərindən yararlanmaq istəyir.

“Çelsi”nin satışı prosesinin uzanması dərhal bir neçə transfer tarixçəsinin yaranmasına səbəb oldu. Düzdü, “zadəganlar”ın bəzi oyunçuları Roman Abramoviç Böyük Britaniya hökumətinin sanksiyalar siyahısına düşənə qədər də başqalarının diqqətini cəlb etmişdi. Komandadakı durumundan narazılığını gizlətməyən Romelo Lukakunun “İnter”ə sərhədsiz sevgisini dilə gətirməsi yadınızdadı? Tomas Tuxel də bugünlərdə maraqlı açıqlama verib:

“Biz özümüzü tamaşaçı kimi hiss edirik. Bu qəribə rol bizi razı salmır. Yay transfer büdcəsi? İndiki vəziyyəti nəzərə alanda onun necə olacağını deyə bilmərəm”.

Alman mütəxəssis onu da bildirdi ki, hələ Todd Boeli ilə görüşməyib. Baxmayaraq ki, Britaniya mediası “Çelsi”nin gələcək sahibinin alman mütəxəssisə tam dəstəklə bağlı vəd verdiyi, həmçinin direktorlar şurasının sədri Bryus Bak və direktor Marina Qranovskaya ilə gələcək əməkdaşlıqla bağlı danışıq apardığı haqda xəbərlər yayır. Mətbuata müdafiəçi Ris Ceyms və xavbek Meyson Mauntla müqavilə müddətinin uzadılmasıyla, həminin Eduar Mendinin maaşının artırılmasıyla bağlı xəbərlər də sızır. Ancaq Britaniya hökuməti və İngiltərə Premyer-Liqasının rəhbərliyi klubun satışını rəsmi şəkildə təsqidləyənə, yəni mayın sonuna qədər “Çelsi” daha bir neçə oyunçusunu itirə bilər. İlk növbədə müdafiə xəttində. Hazırda Ceymsdən başqa yalnız yanvarda müqavilə müddətini gələn ilin yayına qədər uzadan braziliyalı veteran Tyaqo Silva özünü rahat hiss edə bilər.
Andreas Kristensen, planlaşdırdığı kimi, “Barselona”ya gedir. Bundan başqa, kataloniyalılar Markos Alonso ilə Sesar Aspilikuetaya da göz dikib. Hərçənd sonuncu ilə bağlı o məqamı nəzərə almaq lazımdı ki, “Çelsi” ispaniyalı ilə müqavilə müddətini uzatmağın mümkünlüyü bəndini işə salacaq. Antonio Rüdigerlə bağlı vəziyyət daha sadədi. Yeni müqavilə mövzusunda danışıqlar “Çelsi”də indiki böhran baş qaldırana qədər dalana dirənmişdi. İndiki vəziyyətdə isə maaşın artırılmasından, futbolçunun agentlərinə yüksək məbləğdə xidməthaqqı ödənişindən söhbət gedə bilməz. Odu ki, “Real” vəziyyətdən yararlandı və səviyyəli müdafiəçini azad agent qismində rənglərinə bağladı. Rio Ferdinand hətta Rüdigeri “Mançester Siti”dən olan Ruben Diaşla birgə premyer-liqanın ən yaxşı müdafiəçisi adlandırır. Ancaq bu sövdələşmə ilə bağlı hər şey bu qədər rəvandı? Ona qalsa, Eden Azarın transferi zamanı hər kəs Madridə yeni kralın gəldiyini deyirdi. Axırı nə oldu?!

Paltardəyişmə otağının lideri

“Real”ın debütantının asan olmayan xarakterindən başlayaq. İngiltərədə iddia edirlər ki, Rüdiger Aspilikueta ilə daim münaqişədə olub, qolkiper Kepa Arrisabalaqa ilə də məşqdə dalaşıb. Bundan başqa, Almaniya yığmasının müdafiəçisi heç də həmişə məşqçilərlə ortaq dil tapmayıb. Antonio Konte oyunların birindən sonra taktikanı tənqid etdiyinə görə onu heyətdən çıxarmışdı. Rüdiger Mauritsio Sarrinin məşqlərini məktəb dərsləri ilə müqayisə etmişdi, yəni ki hər şey dəfələrlə təkrarlanır. Frenk Lempardın dönəmində daim heyətə düşmədiyinə görə “Çelsi”dən getmək istəmişdi. Amma Tuxelin gəlişi ilə hər şey dəyişdi. Bunu hətta prosesi kənardan izləyənlər də qeyd edirdilər. “Bavariya”nın baş məşqçisi Yulian Naqelsmanndan futbolçunu Münhenə dəvət etmək planları ilə bağlı soruşanda belə cavab vermişdi:

“Tomas onunla çox yaxşı işlədi. Ehtiyatda otururdu, ancaq indi “Çelsi”nin aparıcı müdafiəçilərindən biridi”. “Tomas mənə oynamaq imkanı yaratmaqla inamını göstərdi. Heyətin qapısını üzümə açmaqla özünəinamıma önəmli təsir göstərdi” – bu isə futbolçunun fikridi. Rüdigerlə gözlənilən ayrılığı göz önünə alan alman mütəxəssis də onun ünvanına kompliment yağdırır: “O, paltardəyişmə otağında futbolçulara özünəinam aşılayır. Antonio unikal şəxsiyyət, inadkar liderdi. Möhtəşəm səviyyə göstərir, məsuliyyəti sevir”.

Paltardəyişmə otağında özünü daha fəal aparmağı Rüdigerdən məhz Tuxel xahiş edib. Karlo Ançelottinin qarşısında duran vəzifə almanın bu keyfiyyətlərini Madriddə də qorumaqdı. Burda italiyalı mütəxəssisin yeniyetmələri ilə unikal dil tapmaq bacarığı işə yaramalıdı. Don Karlo bunu bacarsa, komandasında Serxio Ramosu çox xatırladan futbolçu peyda olacaq. Təkcə xarakterinə yox, oyun üslubuna görə də. Söhbət Rüdigerun yüksək təzyiq altında aqressiv oynamaq sevgisindən, həmçinin hücumlarda iştirakından gedir. İndiki “Real”da bu heç də həmişə çatışmır. Ona görə ki, Eder Militao mərkəz müdafiəçiləri tandemində “qul əməyi görür”, universal David Alabaya isə bu mövqe yaddı. Və bu məqamda yenə Tuxelin işini vurğulamalıyıq. “Çelsi”nin üç mərkəz müdafiəçili sxemində Rüdigerin heç vaxt “sığortalama” ilə bağlı problemi olmayıb, risk imkanı qazanıb. “Real” Zidanın dönəmində qısa zaman kəsiyində bu sxemlə oynayıb, ancaq onda da məcburiyyətdən. İndi artıq problem yoxdu, madridlilərin Kazemirosu da var. İdeal vəziyyətdə olan braziliyalı orta sahədəki oyundaşlarının əl-qolunu açmaqla yanaşı, rəqibin əks-hücumlarının qarşısını kəsməklə cinah və mərkəz müdafiəçilərinin hücuma qoşulmasını da “sığortalayır”. Ramosun dövründə də belə idi. Rüdiger xarizmatik kapitanın davamçısı olacaqmı – bu artıq onun özündən və Ançelottidən asılıdı.