Nəhayət, “Çelsi”nin satış prosesi rəsmən yekunlaşıb. Rusiyalı Roman Abramoviç artıq bu klubun sahibi deyil.

"Football-plus.az" xəbər verir ki, bu məlumatı Böyük Britaniyada Hüquqi Şəxslərin Birləşmiş Dövlət Reyestri məlumat yayıb. London klubu ABŞ-dan olan Todd Boelinin başçılıq etdiyi konsorsiuma satılıb. Böyük Britaniya hökuməti ölkədəki aktivləri dondurulan Abramoviçin klubun satışından heç bir fayda görməyəcəyinə dair hüquqi təminat aldıqdan sonra sövdələşməni təsdiqləyib. Müqavilənin dəyəri 4,25 milyard funt sterlinq (təxminən 5 milyard avro) təşkil edir.

Xatırladaq ki, Abramoviç fevralın 26-da klubun idarəçiliyini “Çelsi” Xeyriyyə Fondunun qəyyumlarına təhvil vermiş, martın 2-də isə klubu satmaq niyyətində olduğunu bəyan etmişdi. Martın 10-da Böyük Britaniya hökuməti Abramoviçə qarşı sanksiyalar tətbiq etmiş, biznesmenin və futbol klubunun aktivləri bloklanmışdı.