Argentinalı niyə “Yuve”də superulduz ola bilmədi?

Bazar ertəsi keçirilən “Latiso” ilə ev oyununda “Yuventus”un iki ilduzu – Corco Kyellini və Paolo Dibala fanatlarla vidalaşdı. Sadəcə, onlar fərqli şəkildə gedirlər. Veteran müdafiəçi ya təqaüdə çıxır, ya da “qoca sinyora”nın əfsanəsi statusunda MLS-ə yollanacaq. Argentinalı isə Turindən heç cür böyük futbolçu potensialını aça bilmədən ayrılır. 28 yaşlı Dibala hələ də çoxlarının gözündə mütləq əsl superulduza çevriləcək, ümidverici gənc kimi qalır. Bəlkə də ona hədsiz yüksək dəyər verilib. Ancaq bu qədər nüfuzlu futbol adamı dəyərləndirmədə səhvə yol verə bilməz ki! Məsələn, Alessandro Del Pyero Dibalanı özünün varisi adlandırırdı. Və ya Karlo Ançelotti bir neçə il əvvəl deyirdi ki, argentinalı unikal istedada malikdi, onu heç kimlə müqayisə etmək olmaz, Paolo və Neymar yeni Lionel Messi – Kriştiano Ronaldo tandemi ola bilər. 2017-nin aprelində “Yuventus” Çempionlar Liqasında “Barselona”nı məhv edəndə “Tuttosport” belə bir “qışqıran” manşetlə çıxmışdı:

“Palermo”dan transfer olunandan sonrakı ilk üç mövsüm Dibalanın Turin karyerasının ən yaxşı dönəmi idi. A seriyasında mübarizəyə 19 qolla başladı. 2017/18 mövsümündə şəxsi məhsuldarlıq rekordunu 22 qola qaldırdı. Ardından Kriştiano Ronaldonun transferi baş verdi. Dibalanın meydandan kənarda onunla münasibətləri ən yüksək səviyyədə olsa da, meydanda heç nə alınmadı. Argentinalı kimi, baş məşqçi Massimiliano Alleqri də bu vəziyyətin girovuna çevrildi. Ronaldo ulduzdu. Ancaq müdafiə əməliyyatlarında iştirak etməyən iki futbolçunun eyni vaxtda meydanda görünməsi “Yuve” kimi nəhəng üçün də çox böyük boşluq olardı. Dibalanın satışında israr edən mütəxəssis sonda özü getdi. Alleqri qayıdandan sonra futbolçuya meydanda yer tapmaqla bağlı ikinci axtarış da uğursuz bitdi. Argentinalının heç vaxt superulduzlarla münasibət baxımından bəxti gətirməyib. “Yuve”də Ronaldonun kölgəsində qalıbsa, yığmada da Messi ilə eyni problemi yaşayıb. Dibala hansısa məqamda Leo ilə birgə oynamağın onun üçün çətin olduğunu etitaf edib. Leo isə bu vəziyyəti tam sakit qarşılayaraq aydınlaşdırıb ki, “Yuve”nin forvardı meydanda məhz onun “Barselona”da və milli komandada çıxış etdiyi mövqelərə meyillənir. Hətta taktiki fantaziyaları dolub-daşan Argentina yığmasının sabiq baş məşqçisi Xorxe Sampaoli də dünya çempionatına vəsiqə uğrunda mübarizədə eksperimentlərə vaxt olmadığını bildirməklə bu labirintdən çıxış yolu tapmamışdı. Messinin yığmada ilk titulunu qazanmaqla bağlı arzusunu çin edən Lionel Skalonu bu məsələ ilə bağlı daha nikbin düşünür və belə hesab edirdi ki, iki ulduzun eyni vaxtda oynaması mümkündü. Məşqçi deyirdi ki, ona vaxt lazımdı, ancaq bir neçə il ərzində heç nə dəyişmədi. Və burda qeyd etməyə dəyər ki, Dibala həmişə öz imkanlarını dəqiq qiymətləndirib. O, Messi ilə birgə oynamağın çətinliyini etiraf etməklə yanaşı, onu da deyirdi ki, premyer-liqa oyun üslubuna uyğun deyil, bu üzdən İngiltərəyə mümkün keçid variantına isti yanaşmır. Deməli, Paolonu “Nyukasl”ın ən yüksək ödənişli futbolçusuna çevirə biləcək danışıqlar, “Mançester Yunayted” və “Arsenal” təmsilçiləri ilə təmaslar əvvəlcədən uğursuzluğa məhkum idi. Eyni fikirlər bundesliqaya və Dortmund “Borussiya”sına da aiddi. Dibalanın rahatlıq zonası İtaliyadı. Bu üzdən az qala yüzfaizlik əminliklə demək olar ki, gələn mövsüm forvardı “İnter” formasında görəcəyik. Turində olduğu kimi, orda da pullarını saymağa məcburdular. Ancaq İvan Perişiç, Arturo Vidal, Aleksis Sançes və ola bilsin, Samir Handanoviç ilə vidalaşandan sonra Dibalanın müqaviləsi üçün vəsait tapılacaq. Və belədə argentinalının iki yolu qalır: ya Milanda aparıcı fiqura çevriləcək, ya da inkişafında heç cür ən yüksək zirvəyə çata bilməyən istedadlı oyunçu kimi qalacaq.