“Heç kimi indidən “Araz-Naxçıvan”ın finala yüksələcəyini düşünməsin” - AÇIQLAMA
Cəmi 2 gündən sonra Yüksək Liqada həlledici mərhələ - pley-off oyunları keçiriləcək. “Araz-Naxçıvan” finala gedən yolda “Baku Fire” ilə üz-üzə gələcək.
İllərdir qızıl medalları heç kimə verməyən çempion növbəti dəfə titulunu qoruya biləcək? Komandanın baş məşqçisi Joze Alesio Da Silva bu barədə federasiyanın rəsmi saytına açıqlama verib?“Təxminən bir illik fasilədən sonra zalların üzümüzə açılması, çempionatın bərpası, oyunların keçirilməsi müsbət haldı. Buna görə də sevinmək lazımdı. Əlbəttə, işin təşkilati tərəfindən də narazı qala bilmərəm. İstər oyunların keçirilməsi üçün zalların ayrılması, təqvimin müəyyənləşdirilməsi, komandalara yaranan problemlərin dərhal həllində köməkliyin göstərilməsindən məmnunuq. Əsas narahat edən məqam komandaların gözlədiyimdən bir qədər zəif çıxış etməsidir. Düzdür, mövsümə “Record club” yaxşı heyətlə başlamışdı. İranlı legionerlərlə “döyüşə” atılan komandanın uğuru uzun çəkmədi və heyəti dağıldı. Hakimlərlə bağlı da işlər görülür, amma bir qədər diqqətli olmalarını arzulayıram. Başa düşürəm, oyun intizamı, qaydaları əsasdır və hər kəs buna riayət etməlidir. Lakin fikrimcə vərəqədən çox istifadə edirlər. Həlledici raund çox gərgin keçəcək. Çünki çempionatın ən yaxşı iştirakçıları bu mərhələdə gücünü sınayacaq. Əsas mərhələdən fərqli matçlar izləyəcəyik. Finala gedən yolda rəqibimiz “Baku Fire”di. Güclü heyətə malikdirlər. Həm təcrübəli, həm də gənc futzalçılarla bizə, “Neftçi”yə, EKOL-a qarşı uğurlu oyunlar keçiriblər. Hörmətlə yanaşırıq. Özlərinin oyun üslubu, intizamı olan komandadı. Çox diqqətli olmalıyıq. Yaxşı təşkilatlanmış bir komanda ilə qarşılaşacağıq. Heyətimizdə də itkilər var. Əsas qapıçımız, eləcə də heyət oyunçularımızdan biri bizə kömək edə bilməyəcək. Heyətimiz məhduddu. İtkilərin olması da mənfi təsir edəcək. İlk görüşdə gənc qapıçının ümidinə qalacağıq. Elə etməliyik ki, problem yaşamayaq. Müəyyən taktiki gedişlər edəcəyik. Xüsusilə də qapıçımızın təcrübəsiz olması bizi düşündürür. Ancaq heç kimi indidən “Araz-Naxçıvan”ın finala yüksələcəyini düşünməsin. Hər iki komandanın şansı bərabərdi".
Digər xəbərlər
