Robert Levandovskinin “Bavariya” ilə müqavilənin müddətini uzadıb-uzatmayacağı ətrafında aylardı söhbət gedir.

Klubdan verilən açıqlamalara və polşalı hücumçunun müsahibələrinə baxsaq, müddətin uzadılması mümkündü, ancaq ulduzun gedişi də mümkünsüz deyil. Onun son iki mövsümü parlaq keçirdiyini nəzərə alsaq, bəlkə də belə durum çoxlarına qəribə görünə bilər. Levandovski ideal hücumçu tipinin təcəssümüdü: olduqca sabitdi, heç nədən qol yaradır, sadəcə, ayağını və ya başını qoymaqla çoxlu qol vurur. Məhz belə qollar çempionat kimi “uzun məsafəli” yarışlarda önə çıxır. Polşalının yaxşı texnikası və qeyri-adi plastikliyi də var. Bütün bunların fonunda müdafiənin də köməyinə çatır. Futbol yoluna hansı mövqedə başladığını nəzərə alsaq, müdafiə qabiliyyətləri qanındadı.

Levandovski müasir dövrün ən yaxşı “9 nömrə”lərindən biri sayılır. Hərçənd Ronaldo, Benzema kimi daha geniş funksiyalar malik futbolçulara qlobal baxımdam uduza da bilər. Ancaq klassik forvardlar arasında qeyd-şərtsiz 1 nömrədi. Levanın 33 yaşı var, müasir futbolda isə bu o qədər də çox sayılmır. Heç olmasa, “Milan” ilə A seriyasını qazanmağa hazırlaşan İbrahimoviçi xatırlayaq. Polşalının sağlıq durumuna münasibətini və idman formasına yanaşmasını nəzərə alsaq, o, çox asanlıqla 40 yaşına qədər oynaya və Avropanın istənilən top-klubuna fayda verməyə qadirdi. Çünki Levadan rəqibin başını gicəlləndirən driblinq və ya müdafiəçilərin arxasına qəfil keçmək tələb olunmur. O, cərimə meydançasının kralıdı!

Tərəflər müqavilə müddətinin uzadılmamasından nə qazanacaq? Təmiz söhbət etsək, praktiki cəhətdən heç nə. Levandovski “Bavariya”nın oyun sisteminə və gözəl anlaşdığı çoxillik komanda yoldaşlarına öyrəşib. Məhz burda Çempionlar Liqasında qələbə üçün mübarizə aparmaq şansı var. Bundesliqada çempionluq onsuz da şübhə doğurmur. “Bavariya”nın maliyyə məsələlərində nisbətən təvazökar davranışı fonunda belə, çətin ki, “Barselona” Levandovskiyə yüksək məbləğ təklif edə bilə. Bəs futbolçu “Barariya”ya hansı təminatları verir? Formama, əhval-ruhiyyəmə, zədələrə, ümumiyyətlə, heç nəyə görə narahat olmayın! Polşalının komandanın heyətində cari futbol mövsümündə keçirdiyi 37 oyunda 45 qol vurduğunu, 4 məhsuldar ötürmə verdiyini unutmayaq. Faydalı iş əmsalının həcmi baxımından artıq şərhə ehtiyac yoxdu. 25 qol vurduğu debüt mövsümü istisnadı. Qalan bütün mövsümlərdə 40 qol Leva üçün su içmək qədər asandı.

Bəlkə də futbolçunun hansısa motivasiyası var. Bəlkə də Levandovski yeni çağırışlara qucaq açmaq, başqa liqalarda titul qazanmaq, yeni layihələrdə yer almaq istəyir. Bəzi mənbələr “Barsa” ilə şifahi razılıqdan dəm vurur ki, indiki məqamda buna inanmaq çətindi. Belə hal baş versə, “Barsa” üçün Luis Suaresin transferi qədər uğurlu olacaq. Oyununda eniş təhlükəsinə və yaşına görə narahat olmadan polşalıya 5 illik müqavilə təklif etmək olar. Ancaq bu Robertonun özünə lazımdımı? Başqa mədəniyyət, başqa dil, yeni klub və böyük pullar fonunda yüksək təzyiq – belə açıq məqamlar var. Bəs “Bavariya” Holann tipli hansısa gənc istedadı transfer etməyə hazırlaşırmı? Yox, münhenlilərin belə düşüncə ilə yaşamır. Birincisi, belələri onlara baha başa gələcək, üstəlik bazarda istedad qıtlığı var (“Bavariya” Holann uğrunda mübarizəyə qoşulmayıb). Bu üzdən Leva ilə bağlı istənilən dəyişiklik komandanı zəiflədəcək.

Bu gün üçün ən yaxşı variant dartışıb-bərkişəndən sonra Levandovskinin “Bavariya” ilə yeni müqaviləyə imza atmasıdı. Futbolçu ilə klub arasındakı ideal simbiozu pozmaq axmaqlıq olardı. Yox, pozulsa, hər tərəf özündən küssün.