Ağatahir Əzimovdan “bişmiş toyuğu” güldürəcək bəhanələr - AÇIQLAMA
19 yaşadək futzalçılardan ibarət milli Xorvatiyada təşkil olunan Avropa çempionatının seçmə mərhələsinin 7-ci qrupunda hər iki matçı uduzaraq, dünən səhər saatlarında Bakıya dönüblər.
Ağatahir Əzimovun çalışdırıdğı yığma ilk oyun günündə meydan sahiblərinə 6:1 hesabı ilə yenilibsə, qrupun son qarşılaşmasında Latviyadan olan həmyaşıdları qarşısında “ağ bayraq” qaldırıblar – 4:1. İki görüşdə ümumilikdə qapısında 10 top görən U-19, rəqibləri cəmi 2 (?) dəfə məyus edə biliblər ki, bu da ölkədə futzalın gələcəyinin qaranlıq olmasından xəbər verir.
İki ilə yaxındı bir yerdə olan komandanın uğursuzluğunun nədən qaynaqlandığını öyrənmək üçün komandanın baş məşqçisi ilə əlaqə saxladıq. Əzimov “Football-plus” az saytına bunları söylədi:
“Bildiyiniz kimi ilk oyunumuz meydan sahibləri Xorvatiya qarşı oldu. Bu kollektiv ötən Avropa çempionatının finalında oynayıb. İlk dəqiqələr kəşfiyyat xarakteri daşıdı. Dəqiqələr ötdükcə rəqib bizi “sıxmağa” başladı. İlk yarıda uşaqlar bir qədər həyacanlı idi. Yığmanın turnir ərəfəsində yoxlama görüşləri keçirməməsi özünü göstərirdi. Rəqiblər isə bu arada 5-10 yoxlama matçında güclərini sınayıblar. Bu oyunlarda təcrübəsizlik də sözünü dedi. Xorvatiyanın şərəfini qoruyan futzalçılar bəlkə də 10 ildi bir yerdə oynayırlar. Qapıçıların da kobud səhvləri oldu. İlk hissədən sonra uşaqlara “onsuz da uduzuruq, çıxın sərbəst oynayın” söylədim. Bizim uşaqların üstünlüyü onda idi ki, daha çevikdilər. Onu da bildirim ki, rəqibin ən bəstəboy futzalçısı, bizim ən hündürboy oyunçumuzdan belə uca idi. Komandamızın oyunu əsasən 5-6 futzalçıçının üzərində qurulub. Ehtiyatda oturanlarımız xorvatların yanında o qədər cılız görünürdülər ki, onlar bizimkiləri əzib keçərdilər. Açığı, yeniyetmələrimiz xorvat həmyaşıdlarından fiziki cəhətdən çox zəif idilər. İkinci hissə komanda pis təsir bağışlamadı. Pressinq sayəsində nəsə etməyə çalışırdıq”.
Ağatahir bəy Latviyanın da fiziki cəhətdən millidən üstün olduğunu, məhz bunun sayəsində qalib gəldiklərini bildirdi:
“Latviyalı futzalçılar xorvatlardan da hündür, onlardan da fiziki cəhətdən üstün idilər. Hiss olunurdu oturuşmuş kollektivdi. Bəlkə də 10 dənə fərqli hazırlanmış standartları var idi. Rəqib 1:0 hesabı ilə önə çıxandan sonra komandamın 3-4 dənə real qol şansı olsa da, istifadə edə bilmədik. İkinci hissə də isə komanda yoruldu. Təqvim edə qurulmuşdu ki, ardıcıl oyun keçirən komanda yalnız biz idik. İstər Xorvatiya, istərsə də Latviya ilk görüşünü bizə qarşı keçirdilər. İkinci matçın ikinci yarısı yorğunluq səbəbindən heç nə edə bilmədik”.
Bu da yığmanın baş məşqçisinin biabırçılığa bəhanələri. Ağatahir bəy elə danışır ki, sanki, futzalda yox, basketbolda baş məşqçidi və çalışdırdığı komanda məhz boy səbəbindən basketbol üzrə seçmə mərhələdə hər iki görüşü məğlubiyyətlə başa vurub. Görəsən, futzalda boy məsələsi nə vaxtdan “əsas silah” olub? Baş məşqçi özü də etiraf edir ki, Latviyanın ev hazırlığı olan 10 sandartı var idi. Bunu etiraf edən mütəxəssis yaxşı olardı ki, özündə də günah görüb “mən o səviyyədə məşqçi deyiləm” deyərək, özündə də günah olduğunu etiraf edərdi. Yoxsa, boy belə gəldi, ikinci hissə elə getdi, rəqib standartları daha yaxşı istifadə etdi... Futzalda Latviyaya da uduzuruqsa, onda heç kim əsas yığmanın baş məşqçisi Joze Alesio Da Silvaya “niyə braziliyalıları oynadırsan” sualını verə bilməz.
RƏŞAD
Digər xəbərlər
