Azərbaycan futbolunda o qədər qəribə şeylər görmüşük ki, bizi nə iləsə təəccübləndirmək çox çətindi.

2014-cü ildə “Neftçi”nin vitse-prezidenti Tahir Süleymanov AFFA rəsmilərini kabinetlərdən çıxmağa, bölgələrə səfər etməyə çağırmışdı. Süleymanov ölkə futbolunun idarəçilərini Lənkəranda keçirilən “böyük oyun”u tribunadan izləməyə dəvət etmişdi. Hardan baxsan, burda pis heç nə yox idi. Klub rəsmisinin bu çağırışı yetərincə normal, futbolun ruhuna uyğun idi. Düşünürdük ki, AFFA rəsmiləri onun səsinə səs verəcək, baxımlılığına görə Avropanın müxtəlif çempionatlarındakı derbi oyunlarından geridə qalmayan “Xəzər Lənkəran” – “Neftçi” qarşılaşmasını izləmək üçün “Fırtınalar meydanı”na üz tutacaqlar. Hələ üstəlik, bu çağırışa görə Tahir bəyə minnətdarlıq da edəcəklər. Cavabı nə oldu? AFFA İntizam Komitəsi Tahir Süleymanova 10 oyunluq cəza verib, 20 min manat da cərimə kəsdi. Bu anormal qərar o dövrlərin möhtəşəm “Neftçi”si üçün sonun başlanğıcı idi. “Neftçi”ylə birlikdə “Xəzər Lənkəran” da zəiflədi, “böyük oyun” isə tarixin yaddaşına köçdü.

Lənkəran təmsilçisi rumıniyalı Mirça Redniki “sükan arxasına” gətirmişdi. Həmin vaxt Rumıniya mətbuatı yazırdı ki, mütəxəssis əlində pul dolu çemodanla Buxarest küçələrində futbolçu axtarışındadı. Rednik ölkəsinin üzdə olan klublarında çıxış edən hazır futbolçuları Lənkərana gətirməyə, “Xəzər Lənkəran” üçün Avropa səviyyəli heyət qurmağa çalışırdı. “Neftçi”ylə rəqabət aparmaq xeyli çətin idi. Azərbaycan premyer-liqasında “Bakı”, “İnter”, “Qarabağ” və “Qəbələ” də iddialı idi. “Simurq” yaxşı ortabab sayılırdı. “Rəvan” da Salyanda istənilən rəqibi büdrətməyi bacarırdı. Bu qədər rəqibin üzərinə hakimlər də əlavə olunmuşdu. “Qara paltarlılar” hər imkanda cənub təmsilçisini “vurur”, Rednikin və “Xəzər Lənkəran”ın futbolçularının əziyyətini heçə endirirdi. Tofiq Bəhramov adına Respublika stadionunda keçirilən “Neftçi” – “Xəzər Lənkəran” qarşılaşmasında Anar Salmanov Bəhramovun davamçısı adına yaraşmayan hərəkətləri ilə Redniki özündən çıxarırdı. Buna etiraz edən rumın çalışdırıcı başındakı papağını çıxarıb yerə çırpdı. Bəli, Salmanovun üzünə yox, yerə. Necə ki, insan qəzəblənəndə hirsini soyutmaq üçün hansısa qəribə hərəkətə yol verir. Onun papağını yerə çırpması da kimsəyə zərər yetirmirdi, adi etiraz forması idi. AFFA-nın İntizam Komitəsi yeni “sinə”sini irəli verdi. Rednikin papağını yerə çırpması “aqressiv davranış” kimi xarakterizə edildi və 5 min manat cərimə ilə “qiymətləndirildi”.

Bu iki hadisəni zaman-zaman yazılarımda xatırladıram. Çünki onları unutmaq heç də asan deyil. Həmin siyahını genişləndirib, digər hadisələri də yada salmaq, qaysaqlamış yaraları yenidən qanatmaq mümkündü. Amma buna o qədər də həvəsli deyiləm. Təəssüf ki, bu hadisələrin üzərindən 8 il keçsə də, AFFA İntizam Komitəsi öz “müqəddəs missiyasını” yenə də böyük həvəslə yerinə yetirir. Baxmayaraq ki, indi Azərbaycan premyer-liqasında 7-8 il əvvəlki rəqabət, gərginlik yoxdu. Belə olan halda heç həmin vaxt yaşadığımız rəngli hadisələr də yaşanmır. Amma qılıncının dalı da, qabağı da kəsən İntizam Komitəsi yenə cərimələri bir-birinin ardınca düzməyə, klublara ağır cəzalar verməyə bəhanələr tapır. Bir sözlə, futbol və rəqabət əvvəlki kimi olmasa da, cəzalar əvvəlki kimidi. Davam edir 37...

“Xəzər Lənkəran” futbol səhnəsindən getsə də, İntizam Komitəsi “dişinə vurmağa” mütləq kimisə tapır. Özü də, gözlənildiyi kimi, həmin “qurban” AFFA-dan asılılığı olmayan, onun büdcəsindən “qidalanmayan” müstəqil klub olur. Cənub təmsilçisindən sonra növbə “Qəbələ”yə gəldi. İndi də “Sabah”ın üstünə düşüblər. AFFA bir tərəfdən müstəqil iş adamlarını futbola pul qoymağa çağırır, yardım fondu kimi mücərrəd qurumlar yaradır. Digər tərəfdən də özünə bağlılığı olmayan klublara göz verib, işıq vermir, hər xırda bəhanədə onlara böyük məbləğdə cərimə yağdırır. “Sabah”la “Neftçi”nin hər qarşılaşması AFFA üçün yağlı əppəyə çevrilirb. “Sabah” ölkə kuboku çərçivəsində “Neftçi” ilə qarşılaşdıqdan sonra 23 min 200 manat cərimə olunmuşdu. Bu komandaların premyer-liqadakı görüşü də xeyli bərəkətli keçib. “Sabah” məşqçisi Vitali Kovalyovun özündən çıxmasına görə 4 min, 5 futbolçusu sarı vərəqə aldığına görə 800 manat, Səlahət Ağayevin formasındakı hansısa qüsura görə də bir o qədər ödəməyə məhkum edilib. “Qarabağ”ı da azarkeşlərinin davranışına görə nə az, nə çox – 4 min cərimələyiblər. Maraqlıdı, “Qarabağ” nə etməliydi ki, azarkeşlər hakimə etiraz etməsinlər? Tribunaya buraxılanda onların ağzına bir-bir yapışqan vurulmalıydı? Görünən odu ki, AFFA-nın cəza maşını öz işindədi. Onları nə soyuqda-istidə tribunaya gələn azarkeş maraqlandırır, nə də ölkə futboluna cəlb olunan sponsorların maraqları!

AMAL