“Futbol təkcə turnir cədvəlinə baxaraq dəyərləndirilməməlidi” - AÇIQLAMA
Premyer-liqa ilə yanaşı, 1-ci divizonda da maraqlı oyunlar keçirildi və gözlənilməz nəticə qeydə alındı.
Ölkənin ikinci dərəcəli çempionatının 17-ci turu çərçivəsində baş tutan “Zirə-2” – “Zaqatala” dueli də belə qarşılaşmalardan idi. Bölgə təmsilçisi aşkar favorit sayılsa da, meydan sahibləri sensasion şəkildə 1:0 hesabıyla qalib gəldi. “Zaqatala”nın autsayderə məğlubiyyətini çoxları gözləmirdi. Ötən mövsümün bürünc mükafatçısının işləri qaydasında getmir.
Bunu nəzərə alıb, “yaşıl-sarılar”ın baş məşqçisi Rüstəm Məmmədovla danışmağa qərar verdik. Görəsən, mütəxəssis komandasının hazırkı vəziyyətindən razıdı? Onun qəzetimizə açıqlaması belə oldu:“Komandamızda vəziyyət hazırda çox yaxşıdı. Zədəli oyunçumuz yoxdu. Sadəcə, bir cəzalımız var. Ümumilikdə isə heç bir problemimiz yoxdu. “Zirə-2”yə qarşı son matçda, 10 nəfərlə qalmağımıza baxmayraq, nəzarət tam bizdə idi. Penaltini də dəqiq yerinə yetirə bilmədik. Bu da olan şeydi. Dünya ulduzları belə bəzən penalti qaçırır. Başqa epizodlar da oldu ki, yararlana bilmədik. Səhvlər üzündən qol buraxdıq. Buna görə də dönüş etməyi bacarmadıq. Nəticədən narazı qalsam da, oyunumuzdan və komandamdan razıyam. Heyətdə itkilər var idi. Əsas qapıçımız qırmızı vərəqə cəzalısı olduğuna görə oynamırdı. Bir futbolçumuz isə sarı vərəqə limitini doldurduğundan həmin qarşılaşmada komandaya kömək edə bilmədi. Bu səbəbdən heyətdə məcburi dəyişikliklər oldu. Təəssüf ki, bunlar çox da uğurlu alınmadı. Yəni istədiyimiz keyfiyyəti əldə edə bilmədik. Ancaq dediyim kimi, oyunçularım bacardıqlarını göstərdilər. Gözlədiyimiz nəticə deyildi. Amma mən “autsayderə məğlub olmaq” yanaşması ilə razı deyiləm. Futbol təkcə turnir cədvəlinə baxaraq dəyərləndirilməməlidi. Futboldan normal anlayışı olan biri baxsa, görər ki, “Zirə-2”nin 5 futbolçusu əsas komandada məşq edənlərdi. Məsələn, Rüstəm Nuriyev, Ramil Əhmədov, Nicat Oruclu ötən il bizdə çıxış edirdi. İndi isəəsas komandanın oyunçularıdı. Əli Mürsəlov “Neftçi”dən gəlib. Sərxan Ağayev dəəsas komandanın futbolçusudu. Yən mən orda autsayderlik bir oyun görmədim. Bu nəticələr ötən ilə görədi. Onda çox xal itirirdilər. Ancaq 2022-ci ildə parlaq oyun nümayiş etdirirlər. Ümumiyyətlə, mən oyun baxımından divizonda “birinci yer, autsayder” sözləri ilə razı deyiləm. Bu jurnalistlər arasında yayılan ifadədi və məncə, düzgün deyil. Yəni divizonda birinci, axrıncı yer yoxdu. Yanlış anlayışdı. Tövsiyə edirəm ki, bu ifadəni işlətməsinlər. Turnir cədvəli baxımından var. Lakin oyun baxımından heç bir komanda arasında fərq yoxdu. Bu gün divizonda turnir cədvəlinin lideri sonuncuya da, orta pillələrdə qərarlaşanlara da uduza bilər. Bir sözlə, hamı bir-birindən xal ala bilər. Bu il divizon komandalarının səviyyəsi eynidi”.
Mütəxəssis növbəti mövsüm premyer-liqada çıxış etmək üçün lazımi işlərin görüldüyünü də sözlərinə lavə etdi: “Sənəd baxımından klub tərəfindən hər şey aidiyyatı quruma təqdim olunub. Futbol üçün Zaqatalada hər cür şərait var. İstər aşağı yaş qrupları üzrə komandalar, istərsə də futbolçular üçün yaradılan infrastruktur olsun - hamısı mövcuddu. Yəqin siz də hamı kimi sponsor məsələsi ilə bağlı maraqlanırsız. Bildiyim qədər hazırda yoxdu. Lakin premyer-liqaya yüksəlsək, yəqin sponsorluq etmək istəyənlər olacaq. Bu problem yalnız bizdə yox, bütün divizion klublarında var. Hətta deyərdim ki, hamımızın yeganə ortaq problemidi. İstər Tovuz olsun, istərsə də Gəncə - hamıda şərait eynidi. Problem premyer-liqa üçün lazım olan maliyyədədi. Hamı ümid edir ki, dövlətdən və ya AFFA-dan yardım olunsun, hansısa bir şirkəti sponsor kimi göndərsinlər”.
SƏNƏM FƏRHADOVA
Digər xəbərlər
