Rusiya Futbol İttifaqının şikayəti təmin oluna bilər? – HÜQUQŞÜNAS BAXIŞI
Rusiyanın Ukraynaya hərbi təcavüzü davam edir.
İdman və siyasət bir-birindən nə qədər uzaqdı desək də, FİFA və UEFA Rusiya millisinə, klublarına və idmançılarına qadağalar qoyub, onları turnirlərdən kənarlaşdırıb. Bu qərarlardan sonra Rusiya Futbol İttifaqı İdman Arbitraj Məhkəməsinə (CAS) şikayət ünvanlayıb. Bunun nə ilə nəticələnəcəyini idman hüquqşünası, vəkil Elcan Həsənlidən soruşduq: "Bu şikayət FİFA və UEFA-nın Rusiya millisi və komandalarını bütün idman yarışlarından uzaqlaşdırılması ilə bağlıdı. Məlum qərarlardan sonra CAS-a şikayət ünvanlandı. Müraciəti martın 8-də qeydiyyata alıblar. Media üçün açıqlanan hissədə bildirilib ki, Rusiya Futbol İttifaqı şikayətlə paralel müvəqqəti xarakterli bu qərarların dayandırılması ilə bağlı da ərizə ünvanlayıb. Bunun mahiyyəti nədən ibarətdi? Bu qərarda bildirilir ki, şikayətə baxılan dövr ərzində FİFA və UEFA-nın verdiyi qərarların icrası dayandırılsın və Rusiya milli komandasının və klublarının yarışlarda iştirakına icazə verilsin. İkinci məsələ ondan ibarətdi ki, bu məsələ həll olunana qədər, geridönüşü olmayan vəziyyət yaranacaq. Çünki millinin Polşa ilə oyunu var. Rusiya klublarının da avrokubokda oyunları var. Bu tarix keçəndən sonra qərar qəbul olunsa, UEFA və FİFA-nın qərarı ləğv edilsə belə, artıq geridönüş olmayacaq. Ona görə də ruslar qərarın müvvəqəti dayandırılmasını tələb edirlər. Bu da çox haqlı tələbdi. Rusiyanın əsas arqumenti ondan ibarətdi ki, FİFA və UEFA-nın qərarlarının hüquqi əsası yoxdu. FİFA-nın Əsasnaməsinin 4-cü maddəsinin 2-ci bəndində göstərilir ki, futbol siyasət və dindən ayrı tutulur. Amma əsas məqsədləri naminə bu məsələlərdə bu maddə pozula bilər. FİFA buna əsasən belə qərar verib. Rusiya Futbol İttifaqı isə bunun əksini sübut etməyə çalışır. Onlar bildirir ki, qurumların bu qərarları verməsində arqumentləri çox azdı. Mən də düşünürəm ki, FİFA və UEFA çox ağır qərarlar verib. 1992-ci ildə Yuqoslaviyaya qarşı da eyni addım atılmışdı. Belə sanksiyalar bir çox ölkələrdə tətbiq olunub. CAS Rusiya Futbol İttifaqının şikayətinə 2-3 gün ərzində baxıb qərar verəcək. FİFA və UEFA-nın qərarlarından şikayət məsələsi ilə müəyyən zaman alacaq".
Görəsən, Rusiya Futbol İttifaqı bu məsələdən qalib ayrıla bilər? Hüquqşunasdan bunu da soruşduq: "Məncə, bu daha çox siyasi qərarlardı. CAS-ın da siyasi qərar vermək ehtimalı böyükdü. CAS-ın FİFA və UEFA-nın siyasi təzyiqindən qurtulub müstəqil qərar vermək ehtimalı azdı. Amma ümumi hüquqi prosedur olaraq baxdıqda Rusiya Futbol İttifaqının da yetərincə əsaslı arqumentləri var. Hüquq baxımından bu qərarlar ləğv edilə bilər. FİFA-nın təlimatlarının heç birində müharibə, işğalçılıqla bağlı konkret maddə yoxdu. Rusiya da buna istinad etməyə çalışır. Onların fikrincə, bu qərarlar çox ağırdı. Üstəlik, qeyri-müəyyən vaxtda verilib. Bu da Rusiya üçün əlavə üstünlükdü. Çünki belə qərarların konkret müddət üçün verilməsi daha düzgün olardı".
GÜNAY VƏLİYEVA
Digər xəbərlər
