“Beşiktaş”da Rafa Silvanın baş məşqçi Sərgən Yalçınla yola getməməsi və İstanbulda xoşbəxt olmaması barədə uzun müddətdi ortalıqda dolaşan şayiələr yalan deyilmiş.

"Football-plus.az" xəbər verir ki, İstanbul nəhənginin ulduz futbolçu ilə ciddi problemlər yaşaması şənbə günü rəsmi təsdiqini tapdı. Belə ki, həmin gün başqan Sərdar Adalı ilə baş məşqçi Sərgən Yalçın birgə mətbuat konfransı keçirərək Silva ilə bağlı qalmaqallı həqiqətləri açıqladılar.

İkilinin açıqlamalarından belə aydın oldu ki, 32 yaşlı futbolçu ilə bağlı problem 3-cü turda “İstanbul BŞ” ilə oyundan sonra başlayıb. Həmin matçın 73-cü dəqiqəsində əvəzlənən Rafa daha sonra menecerinə klubdakı durumundan şikayətlənib. Menecer də rəhbərliklə görüşərək onlara ulduz futbolçunun karyerasını bitirmək istədiyini deyib. Sonrakı həftələrdə problem getdikcə böyüyüb. Rafa Silva dəfələrlə zədəsini bəhanə gətirərək məşqlərə və oyunlara çıxmaqdan boyun qaçırıb. Hətta iş o yerə çatıb ki, meneceri rəhbərliyin və Sərgən Yalçının qarşısına “qışda onu sərbəst buraxsaz, o vaxta qədər məşqlərə və oyunlara çıxacaq, sərbəst burtaxmasaz, oyunlara çıxmayacaq” şərtini qoyub.

Təbii ki, “Beşiktaş” əsas ulduzlarından birini pulsuz buraxmaq istəmir. Rəhbərlik müqavilənin qarşılıqlı şəkildə ləğvi üçün 10-15 milyon avro tələb edir. Özü də futbolçunun 2027-nin yayına qədər müqaviləsi var.

Ertəsi gün Rafa Silvanın məxsus olduğu “Onsoccer” adlı menecerlik şirkəti “Beşiktaş” rəhbərliyinə 21 maddəlik bir cavab paylaşdı. Orda ilk növbədə Rafanın karyerasını bitirməyə hazılaşmadığı qeyd olundu. O, sadəcə, biranlıq etirazını bildərərək “bu cür oynamaqdansa, karyeramı bitirmək yaxşıdı” deyibmiş. Rəhbərlik də bunu yanlış anlayıbmış. Menecerlik şirkətinin açıqlamasında daha sonra qeyd olunub ki, Rafa Silva özünü klubda heç kimdən üstün saymır. Sadəcə, mövcud şərtlər, eləcə də ona verilən sözlərin yerinə yetirilməməsi üzündən əvvəlki kimi üzərinə düşəni edə bilmir və hələ oktyabrda ayrılmaq istədiyini kluba bildiribmiş. Şirkət eyni zamanda “Beşiktaş”ın futbolçunu havayı transfer etdiyini xatırladıb və bu üzdən müqavilənin ləğvi üçün tələb olunan 15 milyon avronun haqsızlıq olduğuna işarə vurub. Şirkətin paylaşımında daha bir diqqətçəkən məqam Rafa Silvanın Türkiyədə “Beşiktaş”dan başqa klubda oynamayacağına dair söz verməsidi. Bu məqam ona görə maraqlıdı ki, “Fənərbaxça”nın pusquda dayandığı deyilir.

Hətta deyilənə görə, “Fənər” Rafa Silvanın qarşılığında “Beşiktaş”a İrfan Can Kahveci ilə Cengiz Ündəri təklif edib!

Bu qalmaqaldan sonra Rafa Silvanın şənbə günü məşqə çıxıb-çıxmayacağı maraq doğururdu. Həmin gün “Beşiktaş”ın səhər saatlarında trenajor zalında məşqi var idisə, günorta saatlarında adi məşq planlaşdırılmışdı. Amma futbolçu növbəti dəfə ağrılarının olduğunu bəhanə edərək iki məşqin heç birinə çıxmadı! İndi hər kəsi bir sual maraqlandırır: bu məsələnin sonu nə ilə bitəcək? Görünən odu ki, qeyri-müəyyənlik qış transfer dönəmi açılana, yəni yanvara qədər davam edəcək. Belə qarşılıqlı söz davasından sonra tərəflərin ortaq məxrəcə gəlmək ehtimalı sıfra bərabərdi.

“Beşiktaş” rəhbərliyi artıq bu qalmaqaldan minimum zərərlə qurtulmağın yollarını axtarır. İlkin mərhələdə rəhbərlik Rafanın bəhanələrinə birdəfəlik son qoymaq üçün onu başdan-ayağa tibbi müayinədən keçirməyi planlaşdırır. Rafa bu təklifi də geri çevirsə, artıq fərqli addımlar atılacaq.

Qeyri-adi nəsə baş verməsə, portuqaliyalı ilə qışda yollar birdəfəlik ayrılacaq. Ancaq bunun futbolçunun naz-qəmzəsi, yoxsa 120 illik bir “çinarın” şərtləri əsasında olacağı bilinmir. Rafa Silvanın bu mövsüm 16 rəsmi oyunda iştirak etdiyini, hesabına 5 qol, 3 məhsuldar ötürmə yazdığını da bildirək.