“Qalatasaray” üçün yaxşı məcrada davam edən mövsümdə sıxıntılar baş qaldırmağa başlayıb.

"Football-plus.az" xəbər verir ki, İstanbul nəhəngi ötən həftiçi Çempionlar Liqasında səfərdə “Ayaks”ı darmadağın edərək bütün turnirlərdə məğlubiyyətsiz seriyanı 9 oyuna yüksəltdi.

Düşünmək olardı ki, son çempion debütant “Kocaelispor”u da məğlub edərək yığma fasiləsinə yüksək əhval-ruhiyyədə yollanacaq. Amma hər şey əksinə oldu. İstanbul nəhəngi Kocaelidə şok məğlubiyyətlə üzləşdi. Bu azmış kimi, komanda bir-birinin ardınca əsas futbolçularını itirməyə başladı.

Bilindiyi kimi, oyunlara pul qoyuluşu ilə bağlı qalmaqalda adı keçən iki “Qalatasaray”lı futbolçuya – Ərən Elmalı ilə Metehan Baltacıya cəza verildi. Federasiya Ərəni 45 günlüyə, Metehanı 9 aylığa futboldan kənarlaşdırdı. Baltacı ciddi itki sayılmasa da, Elmalı əsas heyətin önəmli isimlərindən idi.

Camiənin göz bəbəyi Viktor Osimhendən də üzücü xəbərlər gəlib. Nigeriya DÇ-2026-nın seçmə turnirinin Afrika zonası üzrə pley-off mərhələsinin final oyununda Konqo DR-ə penalti seriyasında uduzub. Osimhen həmin qarşılaşmanın fasiləsində ayağının arxa hissəsində ciddi ağrılar hiss etdiyi üçün əvəzlənib. Fransanın “Ekip” nəşrinin yazdığına inansaq, ünlü forvard əvəzlənərkən göz yaşını saxlaya bilməyib. Ortaya çıxan ilk görüntülər onun zədəsinin ciddi olduğundan xəbər verir. Osimhen “Qalatasaray” rəsmiləri ilə telefon danışığında ayağında ağrı hiss etdiyini və yeriyərkən axsadığını deyib.

26 yaşlı futbolçu sabah İstanbula qayıdacaq və dərhal da tibbi müayinədən keçəcək. Onun həftəsonu “Gənclərbirliyi”nə qarşı matçı buraxmaq ehtimalı yüksəkdi. Bu arada Osimhenin sabiq “Beşiktaş”lı Artur Masuaku ilə mübarizədə zədələndiyini də bildirək.

“Qalatasaray”ın digər üzvlərinə gəlincə, Yunus Akgün bel yırtığından əməliyyat olunub və bu il bir daha meydana çıxa bilməyəcək. O ən yaxşı halda yanvarın 21-də “Atletiko” ilə matçda oynayacaq.

Türkiyə yığmasının son matçında Kaan Ayhan da zədələndi. Rotasiya oyunçusu kimi istifadə olunan Berkan Kutlu isə noyabrın 15-dəki məşqi zədə üzündən yarımçıq tərk etməli oldu. Yeganə sevindirici xəbər İlkay Gündoğanla bağlıdı. “Bude/Qlimt”lə matçdan öncə zədələnən 35 yaşlı futbolçunun adı bu həftə iştirak ərizəsinə salınacaq. Onun gələn həftə ÇL-də “Yunion”la matçda əsas heyətdə meydana çıxacağı gözlənilir.