Rafa Silva ilə bağlı yeni iddialar
''Beşiktaş''dan ayrılmaq üçün dəridən-qabıqdan çıxan Rafa Silvanın durumu müzakirə olunmaqda davam edir.
"Football-plus.az" xəbər verir ki, artıq bir həftədən çoxdu ki, ulduz futbolçu bel ağrılarını əsas gətirərək məşqlərə çıxmır. Klub isə həftəiçi onu tibbi müayinədən keçirmiş və belində heç bir problemin olmadığını açıqlamışdı. Rafa Silvanın bütün bu həngaməni sabiq klubu ''Benfika''ya qayıtmaq istədiyi üçün etdiyi bildirilir.
Bu arada İstanbul nəhəngi bu durumu fürsətə çevirməyin üzərində baş sındırır. Məsələ burasındadı ki, ''Beşiktaş''ın Jedson Fernandeş və Orkun Kökçü transferlərindən hələ də Lissabon nəhənginə borcu qalıb. Komanda borcun müəyyən hissəsinin silinməsi şərti ilə 32 yaşlı futbolçunu qarşı tərəfə göndərməyə razılıq verə bilər. Rafa Silvanın təmsilçisi müqavilənin qarşılıqlı şəkildə ləğvi üçün 3 milyon avro təklif etmiş, amma ''ağ-qaralar'' bununla razılaşmamışdı.
Bu arada Portuqaliyanın ünlü ''Rekord'' nəşrinin baş redaktoru Serjio Kritinas Rafa Silva haqda son açıqlaması ilə diqqət çəkib. O, futbolçunun klubdan pulsuz ayrılacağını iddia edib:
''Bu məsələ artıq bir savaşa çevrilib. Rafa bu savaşın qalibi olacaq. Qış transfer dönəmində pulsuz ''Beşiktaş''dan ayrılacaq. Məndə olan məlumata görə İstanbul klubu hazırda məsələni FİFA-ya daşımaq üçün vəkillərlə danışıqlar aparır. Digər tərəfdən ''Benfika'' da Rafanın durumunu diqqətlə təqib edir''.
Digər xəbərlər
