İAM rusların şikayətini növbəti dəfə geri çevirdi

Rusiyanın Ukraynaya hərbi təcavüzünün bu ölkənin futboluna ciddi zərbələr vurduğu məlumdu.

Xatırladaq ki, FİFA və UEFA fevralın 28-də Rusiya komandalarının bütün turnirlərdən qeyri-müəyyən müddətə kənarlaşdırıldığını bəyan etmişdi. Rusiya Futbol İttifaqı (RFİ) bu təşkilatların qərarına etiraz əlaməti olaraq martın 7-də İdman Arbitraj Məhkəməsinə (İAM) üz tutmuşdu. İddia ərizəsində məsələyə qısa zamanda baxılmasını və sanksiyaların müvəqqəti də olsa dayandırılmasını istəyən RFİ rəhbərliyi UEFA və FİFA-nın qərarının heç bir hüquqi əsasının olmadığını vurğulamışdı. Lakin İAM rusların ilkin tələbini geri çevirmişdi. Bu qərar isə sanksiyaları qüvvədə saxlamışdı.

İsveçrənin Lozanna şəhərində yerləşən məhkəmə RFİ-nin şikayətinə baxılması prosesini davam etdirirdi. Amma bu instansiya rusların etirazını yenə geri çevirib. RFİ DÇ-2022-nin pley-off mərhələsinin martın 24-nə təyin olunan, lakin FİFA-nın qərarı ilə ləğv edilən Rusiya – Polşa matçının təxirə salınmasını istəsə də, bu xahiş də əsassız sayılıb. Beləliklə, Rusiya yığmasının Qətərdə ilin son aylarında keçiriləcək mundialda iştirakı mümkün olmayacaq.