İki aya yaxındı ''Fənərbaxça''da əsas komandadan kənarlaşdırılan İrfan Can Kahveci və Cenk Tosunun durumunda bir dəyişiklik yoxdu.

"Football-plus.az" xəbər verir ki, İrfan hətta bu vəziyyətdə də yığmaya dəvət almaqda davam edir. O, İspaniyaya qarşı son səfər matçında start heyətində meydana çıxmışdı. Matçın ardından verdiyi açıqlamada isə ''Fənər''ə geri dönmək arzusunu dilə gətirmişdi.

Türkiyə mətbuatının yazdığına inansaq, təcrübəli futbolçu qeyri-müəyyənlikdən təngə gəlib. O qarşıdakı günlərdə başqan Sadəttin Saran ilə görüşərək gələcəyinə aydınlıq gətirmək niyyətindədi.

Həmin söhbətdən sonra İrfan ya əsas komandaya geri dönəcək, ya da ayrılacaq. Amma Saran da bu məsələni öz növbəsində baş məşqçi Domeniko Tedesko ilə müzakirə edəcək. İrfanla bağlı yekun qərarın dekabrın 1-dən, yəni ''Qalatasaray''la derbidən sonra veriləcəyi gözlənilir. Çünki o vaxta qədər Tedesko fikrini heç bir əlavə mövzuya yayındırmaq istəmir.

Cenk Tosunun durumunda isə yenilik yoxdu. Amma əvəzində ona superliqanın 3 klubu - ''Eyüpspor'', ''Kasımpaşa'' və ''Antalyaspor''un maraq göstərdiyi məlum olub. Tedesko ilə yola getməyən 34 yaşlı forvardın qış transfer dönəmində bu 3 klubdan birinə yollanacağı gözlənilir. Həm də Cenkin müqaviləsi onsuz da mövsümün sonunda başa çatır. Bu üzdən ''Fənər'' özü də onun qışda müəyyən məbləğ qarşılığında ayrılmasının tərəfdarıdı.