“Karvan-Yevlax” – “Kəpəz” oyununun 84-cü dəqiqəsində cəlbedici hadisə baş verdi.

Meydan sahiblərindən Samuel Durrant sağ cinahdan, künc bayrağının yaxınlığından topu qapı önünə havalandırdı. Zahirən adi epizod idi, heç bir ciddi təhlükədən söhbət gedə bilməzdi. Amma gəncəlilərin qapıçısı, gözünə döndüyüm Yusif İmanov topu inanılmaz şəkildə əlindən buraxdı. “Kəpəz”in penaltidən vurduğu ikinci qolun müəllifi Rauf Hüseynli topu qapıdan çıxarsa da, məyus, qapıçısından və komanda yoldaşlarından narazı şəkildə iki əlini havaya qaldırır, sonra yanına çırpır.

Bax, mən iddia edirəm və məşhərə qədər də sözümün üstündə durmağa hazıram ki, həmin epizodda top qapı xəttini tam keçmişdi. Təkcə elə Raufun ekranda əksini tapan reaksiyası kifayətdi: baxış, hiss-həyəcan, duyğu yalan danışmır! Rauf demək istəyirdi ki, mən komandamı irəli çıxardım, amma görün siz nə etdiz!

Əksi sübut olunmayan istənilən iddia doğrudu! Mənim iddiamın yalan olduğunu göstərmək üçün ortaya maddi sübut qoyulmalıdı. Baxın, yayınçı şirkət, yəni “CBC Sport” həmin epizodun təkrarını üç dəfə göstərir, heç birində də topun qapı xəttini keçib-keçmədiyi görünmür, hətta bunu aparıcı Gündüz Abbaszadə də etiraf edir. Belədə Rauf Cabbarov hansı mülahizəyə və dəlilə əsasən həmin qolu ləğv etdi? Ekranda “qol yoxlanılır” yazılır, ancaq nə xətt var, nə də dəqiq təsvir. Videotəkrarda Rauf Hüseynli və top kiçik nöqtələri xatırladır.

Mən ölüm, belə təsvir, belə qol yoxlaması, belə VAR olar? Biz kimi aldadırıq və ya aldatmaq istəyirik? VAR-ın əlində-ayağında, qulağında-gözündə hansısa dəqiq təsvir varsa, göstərsinlər, biz də baxaq, feyziyab olaq. İndiki halda isə mən tam əmin şəkildə “Karvan-Yevlax”ın və 4 min yevlaxlı azarkeşin haqqının yeyildiyini iddia edirəm. Əksi sübut olunmayan istənilən iddia doğrudu!

HUŞƏNG