DÇ-də iştirak etməyən futbolçuların və məşqçilərin tibbi müayinədən keçməsi ilə ''Fənərbaxça'' yeni mövsümə hazırlıq dönəminə rəsmən start vermiş oldu.

Sabah komanda ''Topuk Yaylası''nda İsmayıl Kartalın başçılığı altında ilk məşqini keçirəcək. Artıq Kartalın 1-ci köməkçisi olacağı gözlənilən Dirk Kuyt da İstanbula gəlib. İyulun 2-də İstanbul nəhəngi Avstriya toplanışına yola düşəcək. Gündəmdə duran ilk məsələ lazımsız futbolçularla vidalaşmaqdı. Çünki ötən mövsüm icarədə olanları da nəzərə alsaq, müqavilə ilə ''Fənər''ə məxsus olan 39 futbolçu var. Vedat Muriqinin gəlişi ilə bu say 40-a yüksəldi. Transferlərin davam edəcəyini nəzər alsaq, oyunçuların sayı ən azı 45-ə yüksələcək. Mövsümlük iştirak ərizəsinə isə maksimum 28 futbolçu salmaq olur. Yəni ''sarı-lacivərdlilər'' bu yay təxminən 17 futbolçu ilə ya vidalaşacaq, ya da icarəyə verəcək.

Təkcə qapıçıların sayı 5-di. Söhbət Mərt Günok, İrfan Can Eğribayat, Tarık Çətin, Dominik Livakoviç və Edersondan gedir. Böyük ehtimalla ötən mövsümün 2-ci dövrəsini icarədə keçirən İrfan Can və Livakoviçlə yollar ayrılacaq. Amma Edersonun durumuna da aydınlıq gəlməyib. ''Fənər'' braziliyalı qapıçını 20 milyon avroya buraxmağa hazırdı. Ona ''Əl-Hilal'' maraq göstərir.

Ən çox müdafiə və yarımmüdafiədə oyunçu bolluğu diqqət çəkir. Bu mövqelərdə də bir çox futbolçu ilə yollar ayrılacaq.

Bu arada Kartalın qışda böyük pullar qarşılığında ''Fənər''ə gələn, amma cəmi 3 qol vuraraq ümidləri doğrultmayan Sidiki Şerif ilə bağlı planı bəlli olub. O, gənc fransalı forvarddan vinger kimi yararlanacaq. Ümumiyyətlə, Kartal cinahların gücləndirilməsini istəyib. O, yarımmüdafiənin mərkəzindən isə razıdı.