Ölkə çempionatını 3-cü yerdə başa vuraraq Konfrans Liqasına vəsiqə qazanan, lakin UEFA-nın iyunun 2-də verdiyi qərarla turnirdən uzaqlaşdırılan "Turan Tovuz" iyunun 14-də başlayan Türkiyə toplanışını da yarımçıq qoyub, vətənə döndü.

Klubun taleyi aydındı, amma bu klubla müqavilə müddəti bitən gələcəyi bilinməyən futbolçular var ki, onlardan biri də Ayxan Hüseynovdu.
Tovuzluların yarımmüdafiəçisi “Futbol+”lə söhbətdə transfer təklifləri və yığmanın son oyunları haqda danışdı.

- "Turan Tovuz"la müqavilənin müddəti başa çatır. Klubla müddətin uzadılmasıyla bağlı danışıqlarınız olubmu?
- Bu barədə danışıqları agentim aparır. Amma hələ ki “Turan Tovuz"la bu haqda danışığımız olmayıb.

- Yaxşı, onda başqa klublardan təklif varmı?
- Hazırda danışıq apardığımız klublar var. Bunlardan üçü xarici klubdu - biri Almaniya, biri Türkiyə, digəri isə ərəb ölkəsi çempionatında çıxış edir. Almaniya və Türkiyədən olan klublar aşağı liqa təmsilçiləridi.

- "Turan Tovuz"un Konfrans Liqasından kənarlaşdırılması haqda nə düşünürsən?
- UEFA belə qərar verdi. Bununla bağlı deyə biləcəyim bir şey yoxdu.

- Bəs "Turan Tovuz"un Konfrans Liqasından kənarlaşdırılmasının günahkarı kimdi?
- Bu, rəhbərliyə aid olan bir məsələdi. Biz komanda olaraq, Konfrans Liqasına vəsiqə qazanmaq üçün əlimizdən gələni etdik və bunu bacardıq. Təəssüf ki, orda oynamaq qismət olmadı.

- Yığmanın heyətində Malta və San Marino ilə oyunlarda iştirak etdin. Maltaya qalib gələ bilməməyinizin səbəbi nə idi?
- Hər iki oyunda bir qədər bəxtimiz gətirmədi. Biz onlardan qat-qat çox təhlükəli vəziyyət yaratdıq. Amma qalib gələn tərəf Malta oldu. Buna baxmayaraq, komandada hər kəs həvəsli, istəklidi. Düşünürəm ki, Ayxan Abbasovun rəhbərliyi altında yığmamız daha da güclü olacaq və uğurlu nəticələr əldə edəcək. Yeni futbolçular var ki, biz millidə ilk dəfə birlikdə oynamağa başlamışıq. Özümün də əsas milliyə ikinci dəvətimdi. Daha öncə 15 yaşlılardan ibarət yığmada oynamışam. Əsas milliyə "FİFA Series"in oyunları üçün çağrılmışdım. Bu toplanışda yenidən dəvət aldım. Heyətə yeni cəlb olunan çoxlu futbolçu var. Tədricən hər şey qaydasına düşəcək.

- San Marino ilə oyunda gözləntilər böyükhesablı qələbə idi. Lakin San Marinonun sonda tirdən dönən topu qol olsaydı, oyun hətta bərabərliklə yekunlaşacaqdı. Millinin oyununda nə çatışmır ki, hətta asan rəqiblərə qarşı belə çətinlik çəkir?
- Artıq Avropa yığmaları arasında asan rəqib yoxdu. Onlar reytinq cədvəlində arxada olsalar da, heyətindəki futbolçular klublarında daim şans qazanan oyunçulardı. 10 il əvvəl San Marino millisi zəif idi. Hazırda onların heyətində "Sassuolo"da oynayan oyunçu var. Maltanın "Standard"da, "Syon"da çıxış edən futbolçuları var. Biz matçda son nöqtəni qoymaqda bir qədər çətinlik çəkirdik. Önəmli olan epizodları yaratmağı bacarmağımızdı. Baş məşqçimiz də bildirdi ki, təhlükəli hücumlar qururuq, amma nöqtəni də qoymaq lazımdı. Zamanla o da düzələcək. Yoxlama oyunlarında fərqli tapşırıqları yerinə yetirməyə çalışdıq. Ən önəmlisi qarşıdan gələn milli toplanışdı. Orda yaxşı nəticələr qazanmağa çalışacağıq.

- DÇ-2026-da hansı milliyə azarkeşlik edirsən? Mundialla bağlı nə düşünürsən?
- İspanların oyununu çox sevirəm, onlara azarkeşlik edirəm. Futbol əvvəl daha maraqlı idi. Əvvəllər daha çox futbolçu klublarında ön plana çıxıb, sonra milliyə gedəndə daha maraqlı oyunlar bizi gözləyirdi. İndi isə mənzərə fərqlidi. Komanda yoldaşım Roderik Miller də mundialdadı. Panama millisinin oyunlarını da həvəslə gözləyirəm.

- Miller dünya çempionatına yollanandan sonra söhbətiniz olubmu?
- Miller ilə mənim agentim eynidi. Dünya çempionatına yollanmamış danışmışıq. Sevincinin həddi-hüdudu yox idi. Orda iştirak bir futbolçunun karyerasında ən zirvə nöqtəsidi.

MURAD ABDULLAZADƏ