''Fənərbaxça''nın baş məşqçisinin adına rəsmən aydınlıq gəlib.

"Football-plus.az" xəbər verir ki, gözlənildiyi kimi İstanbul nəhəngi Jorje Jezuşun ayrılmasından sonra boşalan vəzifəyə İsmayıl Kartalı gətirib. 62 yaşlı mütəxəssislə birillik müqavilə imzalanıb. Əslində Kartal Həcc ziyarətində idi və onun yalnız bu gün İstanbula qayıdacağı gözlənilirdi. Amma o, dünən axşam saatlarında xüsusi təyyarə ilə vətənə qayıdıb və dərhal klubla danışıqlara başlayaraq birillik müqaviləyə imza atıb.

Qeyd edək ki, Kartal futbolçu kimi 10 il (1983-93) ''Fənər''in şərəfini qoruyub. 2000-ci ildən bu yana məşqçi kimi çalışan mütəxəssis indiyə qədər bir çox klublarda işləyib. Bu, onun 2014/15 və 2021/22-dən sonra ''Fənərbaxça''dakı 3-cü dönəmi olacaq. İndiyə qədər ''sarı-lacivərdlilər'' bu məşqçinin başçılığı altında 67 rəsmi oyundan 42 qələbə, 15 heç-heçə, 10 məğlubiyyətlə (top fərqi - 130:62) ayrılıblar. ''Fənər'' 2014-də Türkiyə superkuboku uğrunda görüşdə ''Qalatasaray''ı oyunsonrası penaltilər seriyasında məğlub edərkən baş məşqçi məhz Kartal idi. Bu arada Kartalın qazancı da məlum olub. Jorje Jezuş bir mövsümə 7 milyon avro qazanmışdı. Amma Türkiyə mətbuatının yazdığına inansaq, Kartalın illik qazancı cəmi 1,5 milyon avroya bərabər olacaq.