Ölkəmizin avrokuboklarda mübarizə aparacaq dörd klubundan üçünün oyun saatları ilə bağlı hər şey dəqiqləşib.

“Football-plus.az” xəbər verir ki, tarixində ilk dəfə Çempionlar Liqasına qatılacaq “Sabah” 1-ci təsnifat mərhələsi çərçivəsində iyulun 7-də “Bank Respublika Arena”da Uels “Nyu Seynts”ini sınağa çəkəcək. Matç saat 20.00-da başlayacaq. Cavab görüşü bir həftə sonra olacaq. “Bayquşlar” iyulun 14-ü, Bakı vaxtıyla saat 21.30-da İngiltərənin Osvestri şəhərində yerləşən “Park Hall”da meydana çıxacaq.

Avropa Liqasında mübarizəyə 1-ci təsnifat mərhələsindən başlayacaq “Qarabağ” iyulun 9-da “Tofiq Bəhramov”da İslandiya “Vestri”sini qəbul edəcək. Oyun saat 20.00-da start götürəcək. Cavab görüşü iyulun 16-da İslandiyanın paytaxtı Reykyavikdə - “Valbjarnarvöllur”da olacaq. Bu oyunun start fiti iyulun 17-si, Bakı vaxtıyla saat 00.00-da çalınacaq.

Konfrans Liqasının 1-ci təsnifat mərhələsində çıxış edəcək “Zirə” iyulun 8-də Gürcüstan “Torpedo”su ilə üz-üzə gələcək. “SOCAR Polymer Arena”da keçiriləcək qarşılaşma saat 20.00-da başlayacaq. Cavab matçı iyulun 16-da, saat 20.00-da Kutaisidə yerləşən Ramaz Şengeliya adına stadionda olacaq.

“Neftçi”nin mübarizəyə başlayacağı tarix isə hələ dəqiq deyil. 2-ci təsnifat mərhələsində “Dinamo-Minsk” (Belarus) – “Sileks” (Şimali Makedoniya) cütünün qalibi ilə üz-üzə gələcək “ağ-qaralar” bunun üçün bir müddət gözləməlidi. Düzdü, bu mərhələnin oyunlarının iyulun 23-ü və 30-da keçiriləcəyi qeyd olunur. Ancaq “Zirə” kimi “Neftçi”nin də matçlarının vaxtı dəyişə bilər.

KƏNAN BAHADIR