“Fənərbaxça” yeni baş məşqçisi Joze Mourinyonun rəhbərliyi altında artıq 2024/25 mövsümünə hazırlıq dönəminə start verib.

“Football-plus.az” xəbər verir ki, öncə İstanbul nəhəngi ilə bağlı transfer xəbərini diqqətinizə çatdıraq. “Sarı-lacivərdlilər” “Fatih Karagümrük”dən istedadlı sol müdafiəçi Ləvənt Mərcanı heyətinə qatıb. 23 yaşlı futbolçu ilə dördillik müqavilə imzalanıb. Keçidin maliyyə detalları açıqlanmasa da, Türkiyə mətbuatı “Fənər”in büdcəsindən 2 milyon avro çıxdığını iddia edir. Bu məbləğin 500 min avrosu Ləvəntin ilk klubu olan “Şalke-04”ə, 1,5 milyon avrosu “Fatih Karagümrük”ə çatacaq. 2021-də Almaniyadan Türkiyəyə gələn və o vaxtdan bəri “Fatih Karagümrük”ün şərəfini qoruyan futbolçu ötən mövsüm superliqada 36 oyuna çıxaraq 1 qol, 5 məhsuldar ötürməlik fayda vermişdi. Bundan başqa, “Fənər”, gözlənildiyi kimi, 2020-dən komandada olan və müqavilə müddəti bu yay bitən Mərt Hakan Yandaşla ikiillik yeni anlaşma əldə olunduğunu açıqladı.

Futbolçular iyunun 22-dən “Can Bartu” bazasında toplaşmağa başladı. İlk iki gündə onlar tibbi müayinədən və müxtəlif fiziki testlərdən keçməli oldular. Hazırda yeni transfer Ləvənt Mərcan, “Rayo Valyekano”dan icarədən qayıdan Krespo, eləcə də Ceko, Mərt Hakan Yandaş, Fred, Bekao, Cengiz Ündər, Sərdar Əziz, İrfan Can Eğribayat, Zayts, Kruniç kimi isimlər düşərgədədi. Komanda Mourinyonun başçılığı altında topla ilk məşqini dünən “Topuq Yaylası” bazasında reallaşdırdı. Məşqdən öncə Mourinyonun avtobusdakı şəklini paylaşaraq “toplanışa gedirəm, artıq meydanda olmaq üçün səbirsizlənirəm” sözlərini yazması marağa səbəb oldu. “Fənər” iyunun 29-na qədər “Topuq Yaylası”nda hazırlıq keçəcək. Bugünkü və ayın 27-dəki məşqlər fanatlar üçün açıq olacaq. İyunun 29-da “Fənərbaxça” burda ilk hazırlıq oyununu keçirəcək. Rəqib “Fənər”in sabiq futbolçusu Mehmet Topalın yenicə baş məşçisinə çevrildiyi Rumıniya təmsilçisi “Petrolul” olacaq. Həmin oyundan sonra komanda İstanbula qayıdacaq. Hazırlığın 2-ci dönəmini “Fənər” iyulun 2-13-ü aralığında Avstriyanın Qrats şəhərində keçəcək. Orda daha üç hazırlıq oyunu nəzərdə tutulub.