Türkiyədə transfer dönəminin bitməsinə 6 gün qalmış ''Fənərbaxça''da legioner bolluğu diqqəti çəkir.

Bilindiyi kimi, mövsümlük iştirak ərizəsinə maksimum 14 əcnəbi oyunçunun adını salmaq mümkündü. Buna görə də İstanbul nəhəngi bir-birinin ardınca legionerlərlə yollarını ayırmaqda davam edir. Dünən Mergim Berişa ilə yollar rəsmən ayrıldı. Almaniyalı forvard bundesliqa təmsilçisi ''Auqsburq''a birilliyə icarəyə verildi. Keçidin detalları hələ ki bəlli deyil. Amma ''Auqsburq'' Berişanı gələn yay daimi əsasda transfer edə bilmək hüququnu da ələ keçirib. Bunun üçün almanlar 4 milyon avro ödəməli olacaqlar. ''Fənər''ə ötən yay 5 milyon avroya ''Zaltsburq''dan gələn 24 yaşlı futbolçu 34 rəsmi oyunda 10 qol, 3 məhsuldar ötürmə ilə fərqlənmişdi. Ayrılmaq üzrə olan digər futbolçu Dimitris Pelkasdı. Yunanıstanlı vinger Acun Ilıcalının sahibi olduğu ''Hall Siti'' ilə anlaşıb. Bu keçidi təsdiqləyən Acun Pelkasın həftəsonu meydana çıxacağına ümid etdiyini bildirib. Bu iki futbolçunun ayrılmasına baxmayaraq, hazırda ''Fənər''də legionerlərin sayı 16-ya bərabərdi. Forvard transferinin qarşısında duran əsas maneə məhz budu. ''Sarı-lacivərdlilər'' ''Valensiya''lı Maksi Qomeslə bütün məsələlərdə anlaşma əldə edib. 26 yaşlı uruqvaylı forvard artıq komanda yoldaşları ilə vidalaşıb və İstanbula gəlməyə hazırdı. Onun gəlişi ilə legionerlərin sayı 17-yə yüksələcək. Bu da o deməkdi ki, komanda daha 3 əcnəbi oyunçu ilə yollarını ayırmaq məcburiyyətindədi. Mətbuatda müxtəlif versiyalar ortaya atılır. Hələ ki ayrılmağa ən yaxın görünən isimlər Filip Novakla Maurisio Lemosdu. Rəhbərlik hər iki oyunçunun menecerinə onlar üçün klub tapmaq göstərişi verib. Yerdə qalan bir əcnəbinin kim olacağı isə çox böyük maraq doğurur. Şayiələrə inansaq, ''Fənər'' əlacsızlıqdan Bruma ilə Qustavo Enrikedən birini komandadan göndərəcək. Halbuki onların hər ikisi bu yay heyətə cəlb olunub! Bruma PSV-dən, Qustavo isə ''Flamenqo''dan birillik icarəyə götürülüb. Bundan başqa Salainin də satılmaq ehtimalı hələ də yüksəkdi. Amma Avropanın bir çox önəmli klubunun hədəfində olmasına baxmayaraq ''Fənərbaxça'' hələ ki macarıstanlı müdafiəçiyə görə rəsmi təklif almayıb.