“Qarabağ”la “Zirə” iyunun 20-də, yəni şənbə günü “Azərsun Arena”da yoxlama oyununda qarşılaşdı.

“Köhlən atlar”ın qələbəsiylə bitən görüş bir çox maraqlı məqamla yadda qaldı. Ancaq bu yazıda ön plana çıxaracağımız məsələ Rəşad Sadıqovun oyundan sonra jurnalistlərin suallarını cavablayarkən “Turan Tovuz”un başına gələn məlum məsələ ilə bağlı söylədikləridi. Söhbət ondan gedir ki, “bozqurd”un Konfrans Liqasında iştirak edə bilməməsi üzündən “qartallar”ı günahlandıran xeyli adam var. Həmin şəxslər iddia edir ki, həm premyer-liqada, həm də ölkə kubokunda uğursuz mövsüm keçirən qəsəbə təmsilçisi avrokuboklara yollana bilmək üçün çarəni tovuzluların 7 futbolçusunun 2019-cu ildə danışılmış oyunlarda iştirak etdiyini UEFA-ya xatırlatmaqda tapıb. “Zirə”nin baş məşqçisi bu iddiaları necə qarşıladığı haqda sualı belə cavabladı:

Heç şübhəsiz, Rəşad bəy bütün sözlərində haqlıdı. O da bildirir ki, bu məsələdə günahkarlar var. Özü də bunu açıq-aşkar deyir və komandasının ünvanına səsləndirilən tənqidlərə sinə gərir, “Zirə”nin bu məsələdən üzüağ çıxmasına çalışır. Əlbəttə, ağlı başında olanlar onu qınaya, dediklərinin əksini sübut etməyə çalışa bilməz. Lakin bəllidi ki, “Turan Tovuz” da başına gələcək bədbəxt hadisədən xəbərdar deyildi. Heç kim klubun avrokuboklara vəsiqə qazanması üçün milyonlarla manat xərcləyən İdarə Heyətinin sədri Ehtiram Quliyevə, komandanı oyunlara hazırlaşdıran Kurban Berdıyevə, hər matçda qələbə uğrunda tər tökən futbolçulara, tribunalara təşrif buyuran, sevimli komandasını heç yanda tək qoymamağa çalışan azarkeşlərə əziyyətinin əbəs olduğunu deməmişdi.

Təbii ki, bu gün AFFA-nı da suçlayanlar var. Onların dəlili isə “Turan Tovuz”un vaxtında məlumatlandırılmamasıdı. Əlbəttə, federasiya da bu məsələdə məsuliyyət daşıyır. Ancaq redaksiyamıza daxil olan məlumata görə, bu qurumun da qarşı tərəfə - “bozqurd”a veriləcək cavabı var. Sadəcə, bu yöndə ilk addımı tovuzlulardan gözləyirlər. Yəni məsələyə “klub özü günahkar axtarışına çıxsın, kimisə ittiham etsin və ya ortaya “dişə vurulası” dəlil qoysun, biz də öz dəlillərimizi deyək” prinsipiylə yanaşırlar.

Öz aramızdı, burda da AFFA haqlıdı. “Turan Tovuz” öz mənafeyi üçün hansısa addım atmırsa, kimlərin səhvi ucbatında zəhmətini puç olduğunu araşdırıb cəzalandırılmaları üçün cəhd göstərmirsə, ümumiyyətlə, susursa, başqaları nə etsin? Axı başverənlərin xronoloji ardıcıllığına nəzər salanda, “bozqurd”un düşərgəsindən hansısa etiraz, azarkeşlər üçün izah və ya ittiham xarakterli də olsa, bəyanat yaymadığını görürük. Halbuki klub dəfələrlə hakimliklə bağlı uzun-uzadı bəyanatlar yayıb, olan, hətta hələ baş verməyən, ancaq ehtimal olunan hadisələrlə bağlı etirazını dilə gətirib. “Turan Tovuz” bu dəfə niyə ağzına su aldı? Bəli-bəli, su aldı! Çünki biz – “Futbol+” dəfələrlə klubun İdarə Heyəti sədrinin müavini Nəsimi Paşayevə, İdman və əməliyyatlar üzrə direktoru Səməd Nəsibova, mətbuat xidmətinin rəhbəri Süleyman Tağıyevə müraciət etsək də, bu barədə açıqlama ala bilmədik.

Kəsəsi, “bozqurd” hadisələrin əvvəlindən axıradək bu məsələdə ictimaiyyətə açıq olmalı, ən azı azarkeşlərini həftələrlə nigaran qoymamalıydı. Rəşad Sadıqov dediklərinə - klubunun mənafeyini qoruduğuna, günahsız olduqlarını əsaslandırdığına görə Azadlıq meydanında dara çəkilmədisə, öz hüquqlarını qorumağa çalışan, kiminsə səhvi ucbatından bəxbəxtliklə üzləşən “Turan Tovuz” da günahkar axtarışına çıxa, hətta bəlkə hədəfə çata bilərdi. Bu dəfə “bozqurd”un susması heç də müdrik davranış olmadı!

KƏNAN BAHADIR