İsmayıl Kartalın birinci köməkçisi bəlli oldu - Tadiç də gəlir?
Məlum olduğu kimi ''Fənərbaxça''da İsmayıl Kartal dönəmi rəsmən başladı.
"Football-plus.az" xəbər verir ki, təcrübəli mütəxəssis artıq 4-cü dəfə İstanbul nəhənginin başına keçdi. Onun köməkçilərinin kim olacağı maraq doğurur.
Bu arada Kartalın birinci köməkçisinin böyük ehtimalla Dirk Kuyt olacağı məlum olub. Bunu ''Fənər''in yeni idarə heyətinin üzvü Cihan Kamer açıqlayıb:
''Kuyt ilə görüşərək anlaşdıq. Birinci köməkçi olacağını eşidəndə sevindi və həyacanlandı. Burdan çempion olaraq ayrılmışdı. İndi də çempion olacaq bir məşqçilər korpusuna qoşulacaq''. Ancaq niderlandlı mütəxəssisi çalışdırdığı ''Dordrext''dən qoparmaq gözlənildiyi qədər asan olmayacaq. Bu klub ''sarı-lacivərdlilər''dən təzminat tələb edir. Klubun idman direktoru Syurd Ars bunları deyib: ''Cümə günü yeni mövsümün hazırlıqlarına başlayırıq. Kuytun bizimlə olmaq ehtimalı çox deyil. Ancaq hərəkətlilik olsa da, ''Fənərbaxça''dan konkret bir tələb gəlməyib. Dirk onlarla danışıqlar aparmaq üçün bizdən icazə istədi. Həm klubumuz, həm də Kuyt üçün doğru şərtlər ortaya çıxsa, onun ayrılmasına mane olmayacağıq. Amma bunun qarşılığında ciddi maddi təzminat tələb edirik''.
Xatırladaq ki, Kuyt ''Fənər''də 2012-15-ci illərdə top qovub. Hazırda 45 yaşı olan Kuytun məşqçi karyerası hələ ki, istənilən səviyyədə keçmir. Bu arada iddialara inansaq, İsmayıl Kartal Duşan Tadiçə öz köməkçisi olmağı təklif edib.
Tadiç 2023/24-də ''Fənər''də məhz Kartalın başçılığı altında çıxış edib. 37 yaşlı serbiyalı ulduz bu günlərdə BƏƏ təmsilçisi ''Əl-Vahda'' ilə müqaviləsini qarşılıqlı şəkildə ləğv edib və hazırda sərbəst futbolçu statusundadı. Onun Kartalın təklifinə necə cavab verəcəyi maraq doğurur.
Digər xəbərlər
