Ola bilər ki, Yuri Vernidub “Neftçi”ni mövsümün sonunda hədəfinə çatdırsın, komanda avrokuboklara vəsiqə qazansın. Amma o da mümkündü ki, Samir Abasovun rəzil günə saldığı “ağ-qaralar” ardıcıl üçüncü il avrokuboklardan kənarda qalsın.

Hadisələrin bundan sonrakı axarından asılı olmayaraq, ukraynalı mütəxəssis artıq adını tarixə yazdırıb, alqışlanası addım atıb!

Bəli-bəli, söhbət onun hər yerdə və hər meydanda Rusiyaya qarşı savaş açmasından gedir. Vernidubun “Neftçi” ilə müqaviləyə xüsusi bənd saldırması haqda xəbəri böyük məmnunluq hissi ilə oxudum. Beləliklə, baş məşqçinin məsuliyyət dairəsinə daxil olan bütün məsələlərdə Rusiya klubları ilə istənilən formada əlaqələr tam istisna olunur. Bu, həm transfer siyasətinə, həm də Rusiya komandaları ilə mümkün yoldaşlıq oyunlarına aiddi. Yəni Vernidubun baş məşqçi olduğu dövrdə "Neftçi" Rusiya klubları ilə yoxlama oyuna keçirə və onlardan futbolçu ala bilməz.

Heç şübhəsiz, Vernidub ətrafında başverənlərdən xəbərdardı. Onun dekabrın 9-da “sükanı arxasına” keçdiyi “Neftçi” cəmi 5 gün sonra Moskva “Lokomotiv”inin akademiyası ilə əməkdaşlıq müqaviləsi imzalayıb. Özü də İslam Kərimov səviyyəsində! Memoranduma əsasən, tərəflər gənc futbolçuların yetişdirilməsi sahəsində təcrübə mübadiləsi aparacaq, Azərbaycan və Rusiyada turnirlər təşkil edəcək. Müqaviləyə təhsil fəaliyyətləri, məşqçilik təcrübələri və başqa sahələrdə əməkdaşlıq da daxildi.

Vernidub gerçək bir vətənpərvər kimi müqaviləsinə belə bənd saldırmalıydı və saldırıb da. Şəxsən mən Azərbaycanın iki ən populyar klubundan birinin təcavüzkar, Qarabağın da 30 ildən artıq müddətdə işğal altında qalmasının əsas səbəbkarı olan ölkənin hansısa klubu ilə əməkdaşlığını təsəvvür etmirəm. Dünya rusdan qaçır, onu imkan daxilində təcrid edir, yarış meydanına buraxmır, biz isə rusa yardım əlimizi uzadır, imicinin təmizlənməsinə dəstək veririk. Olmaz, ola bilməz!

Vernidubun Ukraynadan məhz “Neftçi” üçün çıxmasına yüksək səviyyədə icazə verilib, bu ilin sonunda vətəninə qayıtmağa məcburdu, bununla bağlı öhdəlik götürüb. O vaxta qədər nələrin olacağını bilmirik, amma bildiyimiz odu ki, bu gün “Neftçi”nin “sükanı arxasında” gerçək bir vətənpərvər, vətəni üçün ölməyə və öldürməyə hazır olan məşqçi əyləşib. O, 2022-nin fevralından – Rusiyanın təcavüzü başlayandan bəri döyüşə atılan 3 mindən artıq ukraynalı idman adamından biridi. Müharibə başlayandan dərhal sonra iki dəfə çempion etdiyi, Çempionlar Liqasının qrupuna çıxardığı “Şerif”i atan, dogma Zaporojyeyə atılan mərmilərə dözməyərək Ukrayna Silahlı Qüvvələrinə qoşulan adamdı. Artilleriya diviziyasının tərkibində dogma torpaqların müdafiəsi üçün döyüşüb. Bizə də yaxşı tanış olan oğlu Vitali ilə birgə:

Təbii ki, beləsinə alqış düşür. Təbii ki, azərbaycanlı idmançılar və məşqçilər Vernidubdan nəsə öyrənməlidi. Heç bir işğal cavabsız və cəzasız qala bilməz. Sağ ol, Yuri Nikolayeviç!

ORXAN