“Budapeştdə ya “sülh” olacaqdı, ya da qələbə qazanacaqdıq. “Ferentsvaroş”un müdafiə xəttində problemlərin olduğu əvvəldən bəlliydi. “Qarabağ” gözləniləndən daha çoxunu bacardı. Oyunu iki hissəyə bölmək olar. Birinci hissədə keçidlər və müdafiə xətti yaxşı deyildi. Rəqibin üstün tərəfi cinah ötürmələri idi. Bu üzdən ilk səhvdə qol buraxdıq. Macarların başqa qol epizodları da oldu. Yaxşı ki, gah dirəkdən yan keçdi, gah da Koxalski özünü yaxşı tərəfdən göstərdi. Bizim qol fürsətlərimiz isə anlaşmazlıqlar səbəbindən fayda vermədi, həm də dəqiqlik çatmadı. Hər halda, birinci yarıda hər iki komanda müdafiə xəttində səhvlərə yol verdi. İkinci yarıda isə fürsətləri dəyərləndirə bildik. Ümumi götürsək, 3:1 hesablı qələbə oyunun axarına uyğun oldu”.

“Komanda qələbənin nə dərəcədə çətinliklə qazanıldığını gördü. Hətta bəzi epizodlarda rəqib bizi “bağışladı”. “Ferenstvaroş” başqa qollar da vura bilərdi. Məncə, hansısa xüsusi addıma ehtiyac yoxdu. Komanda asanlıqla qalib gəlmədi. Bəzi hücumların təşkilində çatışmazlıq hiss olundu. 3:1 hesablı qələbə azarkeşlər üçün möhtəşəm nəticə ola bilər. Ancaq məşqçilər korpusu və futbolçular bilir ki, cavab oyununda böyük çətinliklər olacaq. Qalib gəlmək o demək deyil ki, hər şey mükəmməl idi. Futbolçular səhvləri yadında saxlamalı və eyforiyaya qapılmamalıdı. Hər halda, “Qarabağ” cavab oyununda da öz oyununu oynamalı, topu özündə saxlamalı və rəqibə qol vurmaq üçün imkan verməməlidi. Onsuz da rəqib risk edəcək. Azarkeş dəstəyi və Bakının havası da macarlar üçün çətinlik yaradan amillərdən olacaq”.