''Beşiktaş''da ikinci dönəmi istənilən şəkildə keçməyən və mövsüm başa çatan kimi baş məşqçi vəzifəsindən ayrılan Sərgən Yalçın ''Kafa Sports'' adlı ''yutub'' kanalına gündəmə düşəcək acıqlamalar verib.

* ''Fanatlar nə vaxt istəsə, onda da ayrılacam'' demişdim və sözümün üstündə durdum. Fanatlar istədi mən də ayrıldım. Mənə edilənləri Vinçentso İtalyanoya etməyin. İmkan verin, işləsin! Axı ''Beşiktaş'' bu gedişlə hara gedir? Məşqçi dəyiş, rəhbərlik dəyiş, sonra yenə rəhbərlik dəyiş, məşqçi dəyiş... Axırı nə olacaq? Belə bir durumda ''Beşiktaş'' nəyə və hansı nəticələrə ümid bəsləyir?
* Biz başqa məşqçi tərəfindən qurulan bir komandanın başına keçdik. Yəni heyəti biz qurmamışdıq. Bu heyətlə qarşıya ciddi hədəf qoymağın düzgün olmayacağını ilk toplantıdan başqana söylədim. Mən düşünürdüm ki, bu camiədə az da olsa, limitim var. 2-3 illik bir planlaşdırma edərək işə başladıq. Həmin heyət rəqiblərdən 60-70 faiz geridə idi. Bu komanda ardıcıl 18-19 oyunda uduzmadı. Yəni ''ortada ciddi bir uğursuzluq var'' demək də düzgün deyil. Ümumi nəticələr baxımından bəlkə də uğursuz görünə bilər. Amma düzgün yolda idik. Qışda bizim etdiyimiz dəyişiklikləri Türkiyədə heç kim edə bilməzdi!
* ''Beşiktaş''ın sabiq futbolçuları və sabiq komanda yoldaşlarım efirlərdə, ''yutub''da çıxıb ağızlarına gələni danışırlar. Dünyadan xəbərləri yoxdu, amma bir qayda olaraq adamı bel altı vurmağa çalışırlar. Ayıbdı. Sadəcə utanın. Nə məşqçilik, nə də şərhçilik bacarıqları var. Gündəmə gəlmək və klub tərəfindən işlə təmin olunmaq üçün hamını tənqid edirlər. İki üzlü və arxadan iş çevirən insanlardı!
* Çernı mövzusunda məni tənqid edirlər. Guya onunla prinsipim var və bilərəkdən oynatmırdım. Çernını 30 oyunda əsas heyətdə oynatmışam. Bir məşqçi öz oyunçusu ilə niyə prinsip aparsın? Rafa Silva üzündən məni pərişan etdilər. Sonra nə oldu? Rafa Silva böyük ulduz imiş. Harda oynayıb? Nə edib? Keçmişi barədə də çox məlumatım yoxdu.
* Muçi ilə bağlı yanlış qərar verdiyimi düşünmürəm. Nə edirsə, etsin. Mənim oyunçum deyil. İstəyir lap quyruqlu ulduz olsun. Pis oyunçu deyil. ''Trabzonspor''da yaxşı performans sərgilədi. Orda da davam etsin. Mənim oyunçum deyil.
* Son oyunların birində stadionu tərk edərkən tribunadan üstümə su atıldı. Gördüm ki, su şüşəsidi. Biabırçılıqdı sadəcə. Məndən öncəki əcnəbi məşqçilərə su şüşəsi atdızmı? Yox. Niyə? Çünki biz normal maaş alırıq, təzminat almırıq, əlimizdən gələni də edirik. Mən həyatımda bu qədər çalışdığımı xatırlamıram. Sərkan Rəçbər ilə gündə 8 oyun izləyirdik.
* Yığma komanda və böyük komanda çalışdırmaq üçün məşqçinin bir uğuru, kriteriyası olmalıdı. Artıq belə şeylərə baxan yoxdu. Montella hansı uğuruna görə yığma komandanın başına gətirilib? Məsələn, daha öncə nə uğuru olub? Montellanın yığmada Orkun Kökçünü çox oynadacağını düşünmürəm. Orkun hər dəfə yığmanın düşərgəsindən üzgün şəkildə qayıdırdı. Əhval-ruhiyyəsi yerində olmurdu. Məncə, orda nəsə problemlər var.