“Neftçi” 4-1-4-1, “Araz-Naxçıvan” 4-2-3-1 sxemiyla meydana çıxdı. Qonaqlar iki dayaq yarımmüdafiəçisinin yardımıyla meydanın mərkəzində rəqibin hücumlarının qarşısını aldı. “Ağ-qaralar”ın hücumları ilk hissədə o qədər də tutarlı deyildi. Top itkilərinə çox yol verdilər. “Qırmızı-ağlar” meydan sahiblərinin sürətli keçidlər etməsinə imkan vermirdi. Muxtar Respublika təmsilçisi topu ələ keçirən kimi çəkinmədən irəli atılır, müdafiə xəttinin arxasına “sızmağı” bacarırdı. Rəqibi aldatmağı bacardılar. Elmar Baxşıyevin komandası rəqibin meydançasında da cəsarətli çıxış edib qol vurmağa çalışırdı.
Ümumiyyətlə, “Neftçi”nin oyunçuları bərbad deyil. Amma bu matçda həmin keyfiyyəti göstərmədilər. Əksinə, müdafiəçilər qonaqların təhlükəli hücumlar etməsinə “yardım etdi”. “Neftçi”nin futbolçususansa, keçilməməlisən. “Araz-Naxçıvan”ın növbəti yaxşı cəhəti isə rəqibin cərimə meydançasında sürətlə say çoxluğu yarada bilməsidi. “Ağ-qaralar” bəzi epizodlarda riskli oynadı. Amma həmin cəhdlər də uğursuz oldu. Ciddi təzyiq yarada bilmədilər. Elmar Baxşıyevin komandası “Qarabağ” və “Zirə”yə qarşı da belə cəsarətli oyun göstərib. Komandada psixoloji sakitlik var. Bu üzdən istənilən rəqiblə oynayanda rahat olurlar. Qara Qarayevin gəlişi də önəmli addım idi. O, qısa zamanda komandaya uyğunlaşacaq. Belədə kollektiv meydanın mərkəzində də qarşısıalınmaz olacaq. “Araz-Naxçıvan” indiyə qədər hücum və müdafiə xəttində çox yaxşı çıxış edirdisə, artıq yarımmüdafiədə də göz oxşayacaq. “Neftçi” isə daha yaxşı oynamalıdı. Bunun üçün, təbii ki, zaman lazımdı. “Oyunçuları pisdi” deyə bilmirəm. Hamısı təcrübəlidi, amma ölkəmizdə yaxşı performans göstərə bilmirlər. Artıq ikinci ötürmədə topu itirirlər. Çox güman ki, Samir Abasovun oyun üslubunu başa düşəcəklər”.