"Şkendiya" Bakıda möcüzə axtarmalı olacaq" - "Qarabağ" makedoniyalılar üçün məğlubedilməzdi!
"Qarabağ"ın dünən Skopyedə qazandığı qələbə Şimali Makedoniya mətbuatının da diqqətindədi. Həmkarlarımız "köhlən atlar"ın Çempionlar Liqasının 3-cü təsnifat mərhələsinin ilk oyununda "Şkendiya"ya qalib gəlməsini (1:0) şərh edib.
"Football-plus.az" xəbər verir ki, "sportsport.mk" yazıb:
"Qarabağ"ın TNS və ya FKSB olmadığını bilirdik. Azərbaycanlılar daha təcrübəli, cəsarətli idi və bu səbəbdən qələbə qazandılar. Matçın həm yekun hesabı, həm də statistikası "Qarabağ"ın daha güclü olduğunu göstərir. Ən əsası təmsilçimizin hər an qol vura biləcək potensiala sahib olan futbolçusu yoxdu. Odu ki, "Şkendiya" Bakıda möcüzə axtarmalı olacaq. Bununla belə, "Qarabağ" makedoniyalılar üçün məğlubedilməz komanda olduğunu bir daha sübut etdi. Bu komandaya hələ güc gələ bilmirik: 6 oyun, 5 qələbə, 1 heç-heçə. Görünür, hələ çox şeyi dəyişməliyik".
Maraq üçün qeyd edək ki, sonda "Qarabağ"ın "Metallurq" və "Sileks"ə qarşı oyunları xatırladılıb. Axı ağdamlılar Avropa Liqasının 2010/11 və 2013/14 mövsümlərinin ilk təsnifat mərhələsində "Metallurq"la qarşılaşıb və matçlar müvafiq olaraq 4:1, 1:1, 1:0, 1:0 hesabıyla yekunlaşıb.
"Sileks"lə görüş isə Çempionlar Liqasının 2020/21 mövsümünün 1-ci təsnifat mərhələsində təsadüf edib. "Köhlən atlar" pandemiya səbəbindən bir oyundan ibarət olan mərhələ çərçivəsində böyükhesablı qələbə qazanıb - 4:0.
KƏNAN BAHADIR
Digər xəbərlər
