Türkiyə mediasında yayılan məlumatlara inansaq, bu ölkənin 2-ci liqasının çempionu “Serik Bələdiyəspor” klubunun səhmlərinin 50 faizi azərbaycanlı iş adamı tərəfindən alınır.

Adı açıqlanmayan biznesmen klub səhmlərinin yarısı üçün 4 milyon avro ödəyəcək. O, əvvəlcə "Antalyaspor"a müraciət edib. Lakin "qırmızı-ağlar" səhmlərinin paylanılması səbəbindən satışa uyğun gəlməyib. Buna görə də iş adamı "Serik Bələdiyəspor"a üz tutub. İki həftə əvvəl başlayan danışıqlar prosesində son addım iyunun 17-də atılıb.

İddialara görə, azərbaycanlı iş adamı klubu yenidən qurmağa başlayacaq. O, Mehmet Altıparmakın istefaya göndərilməsindən sonra boşalan baş məşqçi postuna əvvəllər Rusiya premier-liqasındakı komandalardan birinə rəhbərlik etmiş mütəxəssis gətirəcək. Bir qədər şübhəli görünsə də, bəlkə də söhbət Nazim Süleymanovdan gedir. Axı Mübariz Mənsimov “Xəzər Lənkəran”ı yaradanda da bu mütəxəssisə güvənmişdi.

"Serik Bələdiyəspor" da Antalya şəhərini təmsil edən klubdu. Klubu kimin alacağını təxmin edəndə ağla gələn ilk versiya Mübariz Mənsimovdu. İllər əvvəl Türkiyənin “Star” qəzetinə açıqlama verən biznesmen Antalyada dəniz və quru üzərində bir neçə biznesinin olduğunu bildirmişdi.

Görünən odu ki, iş adamı Antalyada klub almaqda israrlı olub. “Antalyaspor”u ala bilməyincə şəhərin digər təmsilçisi “Serik Bələdiyəspor”a üz tutub.

Qeyd edək ki, bu şəhərdə 10 mindən çox azərbaycanlı yaşayır.

MÜZƏFFƏR QULUZADƏ