“Karim Rossinin “Şamaxı” ilə müqaviləsinin müddəti bitmişdi. Bizim klubla anlaşması bitən və başqa komandaya keçən futbolçu haqda hansısa fikir söyləməyim peşakarlıqdan uzaq olar. Bu səbəbdən heç nə deyə bilməyəcəm. Bizlə müqavilə müddəti bitəndən sonra azad agent kimi “Qəbələ”yə keçidi baş tutub. Bu, futbolçu ilə klubun ortaq istəyidi.
Digər suala da konkret cavab verə bilməyəcəm. “Şamaxı”nın maliyyə imkanları ilə bağlı, sözsüz, ətraflı məlumatım var. “Qəbələ” haqda isə eyni sözü deyə bilmərəm. Mətbuatda bu barədə fikirlər yayılıb. Mən onları rəsmi məlumat kimi qəbul etmirəm. “Qırmızı-qaralar”ın maliyyə imkanlarının nə yerdə olduğu, “Şamaxı” ilə bərabər səviyyədə olub-olmadığı haqda məlumatım yoxdu.
Biz Rossiyə yeni müqavilə bağlamağı təklif etmişdik. Müəyyən danışıqlarımız oldu. Ortaq məxrəcə gələ bilmədik. Onun komandadan ayrılığında əsas səbəbin maliyyə və ya qeyri-maliyyə ilə bağlı olduğunu söyləmək çətindi. Mən həm jurnalistləri, həm də azarkeşləri anlayıram. Onlar hər ayrılığı həmişə maliyyə ilə bağlayır. Müqavilə isə geniş məfhumdu. Anlaşmanın baş tutması üçün bütün məqamlarda ortaq məxrəcə gəlmək lazımdı. Bəzən çox məqamda razılıq əldə olunsa da, kiçik bir detalda anlaşa bilmirsən. Bütün xırdalıqları razılaşdırandan sonra müqavilə bağlanır. Sözsüz, biz onunla danışmışdıq, yeni müqavilə təklif etmişdik, lakin razılığa gələ bilmədik. Bu baş tutmayıbsa, deməli, bütün xırdalıqlarda anlaşa bilməmişik. Sırf maliyyə baxımından və ya digər səbəbdən razılaşa bilmədiyimizi demək düz olmaz. Müqavilə qüvvədə olduğu müddətdə də şərtləri açıqlamırıq. Bu iki tərəf arasında olan məxfi məlumatdı. Biz bu məqamda da, sadəcə, razılaşmanın neçə il müddətində nəzərdə tutulduğunu söyləyə bilərik. Futbolçuya yeni müqavilə təklif olunub. Razılığa gələ bilmədik. “Qəbələ” isə futbolçu ilə anlaşa bilib. Allah xeyir versin”.