Türkiyədə işləmiş məşqçi həmyerlisinin tərəfini tutdu
Türkiyədə “Kayserispor”, “Qaziantep”, “Çaykur Rizəspor”, “Yeni Malatyaspor” kimi klubları çalışdırmış, hazırda isə Buxarest “Rapid”inin başında yer alan Marius Şumudika tənqid atəşinə tutulan Denis Draquşla bağlı açıqlamalar verib.
"Football-plus.az" xəbər verir ki, ötən mövsüm “Qaziantep”də uğurlu performans sərgilədikdən sonra yayda böyük ümidlərlə “Trabzonspor”a gələn 25 yaşlı Draquş hələ ki inamlı təsir bağışlamır.
Ötən həftə “Fənərbaxça”ya vurduğu qol onun mövsümdə 23-cü rəsmi oyunda cəmi 3-cü qolu oldu. Rumıniya mətbuatı bu futbolçunun yığmaya dəvət almağa layiq olmadığını düşünür. Amma Şumudika onun tərəfini tutub. 54 yaşlı bu mütəxəssis həm də Draquşun mənəvi atasıdı:
“Denis son turda “Fənərbaxça”ya qol vurdu. Mənəvi oğlum olduğu üçün onun oyunlarını yaxından təqib edirəm. Onun haqda nə deməyimi və ya hansı rumıniyalı futbolçu ilə müqayisə etməyimi istəyirsiz? Haqqında deyilənlərin heç biri ilə razı deyiləm. Draquş hazırda ən yaxşı rumıniyalı futbolçulardan biridi. Bunu mənəvi oğlum olduğu üçün söyləmirəm. Siz başqa şeydən bəhs edirsiz, amma mən onun “Fənərbaxça” kimi bir kluba qarşı oynamasından bəhs edirəm. Razıyam, bəlkə də yeni klubunda potensialını tam aça bilməyib. Niyə? Çünki daim meydana iynələrlə, ağrıkəsilcilərlə çıxır. Buna baxmayaraq, Mirça Luçesku yenə də onu yığmaya çağırdı. Sizcə, 80 yaşlı Luçesku başqasının sözü ilə yığmaya futbolçu çağırarmı? Onun buna ehtiyacı varmı? Yığmanın son oyunlarında digər futbolçuları da izlədim. Onlardan bəziləri 90 dəqiqə ərzində heç tərləməmişdi. Draquş bu dəqiqə açıq ara fərqlə yığmanın ən yaxşı forvardıdı”.
Qeyd edək ki, “Trabzonspor”a 1,7 milyon avroya transfer olunan Draquşun dəyəri “transfermarkt”da 3,8 milyon avro göstərilib. Qaradənizlilərlə 2028-ci ilə qədər müqaviləsi olan futbolçu Rumıniya yığmasında indiyə qədər 22 oyuna çıxaraq 5 qol vurub.
Digər xəbərlər
