Çempionlar Liqasında 1/4 final mərhələsinə yekun vuruldu.

Turnir bu mərhələdə həm son finalçısını, həm də son qalibini itirdi. Son finalçı Dortmund ''Borussiya''sı ''Barselona'' səddini aşa bilmədisə, son qalib statusunda olan ''Real'' ''Arsenal'' ilə bacara bilmədi. Səfərdəki 0:3 hesablı acı məğlubiyyətdən sonra Madrid nəhənginin həm fanatları, həm də oyunçuları bir həftə geridönüşün xəyalları ilə yaşasalar da, reallıq tamam başqa cür oldu. ''Blankos'' ''kambək'' bir yana, heç təsəlli qələbəsini də qazana bilmədi! Karlo Ançelottinin komandası London klubuna öz meydanında 1:2 uduzaraq mübarizəni dayandırdı. Hətta oyunun əvvəllərində Sakanın penaltisini dəf edən Kurtuanın qəhrəmanlığı da bir işə yaramadı. Saka fasilədən sonra qol vurmaqla günahını yudu. Bu qoldan dərhal sonra Salibanın kobud səhvi Vinisiusun bərabərlik qolunu vurması ilə nəticələndi. Vini ''Real''da ümumilikdə 105-ci qolunu vurmaqla Ronaldonu (104) geridə qoydu və klub tarixinin ən məhsuldar braziliyalı futbolçusuna çevrildi. Amma ''kral klubu'' üçün qatar artıq getmişdi. Bütün komanda ilə irəli atılan və müdafiəni unudan ''Real'' son anlarda əks-hücumda daha bir qol buraxdı. Martinelli ''Santyaqo Bernabeu''nu susduraraq yekun nəticəni müəyyənləşdirdi.

Beləliklə, ''Real'' 2020-ci ildən bu yana ilk dəfə ÇL-də yarımfinaldan kənar qaldı. Madrid nəhəngi həm də trebl, yəni bir mövsümə hər üç ciddi titulu qazanmaq şansını itirdi. Qeyd edək edək ki, ''Real'' tarixi ərzində heç vaxt trebl qazanmayıb! ''Real'' bu mövsüm rəsmi matçlarda 12-ci dəfə məğlub oldu. Bu, Ançelottinin dönəmində antirekordun təkrarlanması deməkdi. Komanda bu məşqçi ilə daha öncə 2022/23-də də 12 dəfə uduzmuşdu.

''Arsenal''ın isə 2009-dan bu yana ilk dəfə ÇL-də yarımfinala yüksəldiyini bildirək. Bu komanda tarixi ərzində heç vaxt ÇL qazanmayıb. Beləliklə, yarımfinalda ''Arsenal'' PSJ ilə, ''Barselona'' isə ''İnter'' ilə qarşılaşacaq. Turnirdə bir ölkədən birdən artıq klubun oynamasına icazə verildiyi vaxtdan, yəni 1999/00-dən bu yana cəmi 4-cü dəfə yarımfinalda 4 fərqli ölkənin təmsilçiləri iştirak edəcək. Bu hal daha öncə 2003/04 (İngiltərə, İtaliya, Fransa, Portuqaliya), 2009/10 (İtaliya, İspaniya, Almaniya, Fransa) və 2017/18-də (İtaliya, İspaniya, Almaniya, İngiltərə) baş vermişdi.