Türkiyə çempionatından istefa xəbərləri gəlməkdə davam edir.

"Footbal-plus.az" xəbər verir ki, ötən həftə “Pendikspor” portuqaliyalı İvo Veiyra ilə yollarını ayırmışdısa, bu həftə “Qaziantep”də Marius Şumudika dönəmi başa çatdı. Dünən klubdan verilən rəsmi açıqlamada rumıniyalı mütəxəssislə qarşılıqlı şəkildə yolların ayrıldığı qeyd olundu. Bununla da bu ekstravaqant məşqçinin Türkiyədəki 4-cü dönəmi başa çatdı. Şumudika əvvəlki üç fərqli dönəmdə “Kayserispor”, “Çaykur Rizəspor”, “Yeni Malatyaspor” və yenə də “Qaziantep”i çalışdırmışdı. 53 yaşlı mütəxəssis komandanın başına sentyabrın əvvəllərində, Ərdal Günəşin istefaya göndərilməsindən sonra keçmişdi. “Qaziantep” bu mövsüm bu məşqçi ilə keçirdiyi 27 rəsmi matçdan 10 qələbə, 6 heç-heçə, 11 məğlubiyyətlə ayrılmış oldu. Son 9 rəsmi oyunda cəmi 1 qələbəsi olan Antep təmsilçisi hazırda 18-ci pillədə, yəni düşmə zonasında qərarlaşıb. Əslində Şumudika hələ ötən həftə, dəqiq desək, fevralın 26-da qovulmalıydı. Rəhbərlik 27-ci turda evdə “İstanbul BŞ”yə məğlubiyyətdən sonra onunla yolları ayırmağa qərar versə də, başqan Memik Yılmaz son anda qərarını dəyişmişdi. Çünki 3 saatlıq toplantı zamanı Şumudika nəticələrin düzələcəyinə və komandanı elitada saxlayacağına söz vermişdi. Bu məşqçinin qovulmamasına etiraz əlaməti kimi prezidentin köməkçisi Güney Dağdevirən istefa vermişdi. Amma ötən həftəsonu “Antalyaspor”la səfər oyunundakı minimal hesablı məğlubiyyət Şumudika üçün son oldu. Maraqlıdı ki, bu məşqçi yanvarın sonlarında Türkiyə vətəndaşlığını qəbul etməyə hazır olduğunu dilə gətirmişdi. Hələ ki yeni baş məşqçinin kimliyi bəlli deyil. Hazırda namizədlərlə danışıqlar aparılır. Onnların arasında 2022-dən bəri klub çalışdırmayan Həmzə Həmzəoğlunun da olması diqqəti çəkir. İndiyə kimi 13 fərqli klubu çalışdıran bu məşqçinin CV-sində ən diqqətçəkən məqam 2015-ci ildə “Qalatasaray”ın başında üç titul qazanmasıdı. Digər namizədlər isə Rəcəp Uçar, Rza Çalımbay, Tayfun Korkut, Ömər Ərdoğan və Kamal Özdəşdi. “Qaziantep” növbəti oyunu martın 11-də evdə “Beşiktaş”a qarşı keçirəcək.