Türkiyə çempionatında yenə məşqçi istefaları bir-birini əvəz etməyə başlayıb.

"Football-plus.az" olaraq ilk istefanın “İstanbul BŞ”də reallaşdığını xəbər vermişdik.

Mövsümə 3 məğlubiyyətlə başlayan İstanbul təmsilçisi Əmrə Belözoğlu ilə yollarını ayırmışdı. İkinci istefa xəbəri “Qaziantep”dən gəldi. Mövsümün ilk 4 turundan xalsız ayrılan Antep təmsilçisi Ərdal Günəşlə yollarını ayırdı. Məşqçi karyerasında ilk addımlarını atan 41 yaşlı Günəş mayın 24-də bu vəzifəyə gəlmişdi. “Qaziantep”, bilindiyi kimi, ötən mövsümün 2-ci dövrəsinin gedişində zəlzələdən sonra çempionatdan çəkilmək məcburiyyətində qalmışdı. Yəni Günəşin “Qaziantep” karyerası cəmi 4 oyundan ibarət oldu. Böyük ehtimalla onu Marius Şumudika əvəzləyəcək. 52 yaşlı rumıniyalı mütəxəssislə birillik anlaşma əldə olunub və o, Türkiyəyə dəvət edilib. Dilini dinc saxlamağı xoşlamayan, tez-tez qalmaqallı açıqlamalar verən Şumudika Türkiyə futboluna gözəl bələddi. O, daha öncə “Kayserispor”, “Çaykur Rizəspor”, “Yeni Malatyspor”da və hətta “Qaziantep”in özündə də çalışıb. Şumudika son 2 mövsümdə Səudiyyə Ərəbistanı təmsilçiləri “Əl-Şabab” və “Əl-Rayed”i çalışdırıb. Maraqlıdı ki, o, bu ilin martında karyerasını bitirdiyini açıqlamış və bundan sonra vaxtını ailəsinə həsr etmək istədiyini bildirmişdi.

Dünən isə daha bir istefa xəbəri gəldi. Bu dəfə “Kayserispor”dan. Halbuki komanda mövsümə heç də bərbad başlamamışdı (4 oyun, 1 qələbə, 3 heç-heçə). Amma bu ayrılıq klubun yox, məşqçinin istəyi ilə baş tutub. Belə ki, Çağdaş Atan sosial şəbəkədəki səhifəsində vida paylaşımı edib. 43 yaşlı mütəxəssis ötən ilin yayından klubun başında idi. “Kayserispor” onun dönəmində keçirdiyi 43 oyundan 18 qələbə, 8 heç-heçə, 17 məğlubiyyətlə ayılıb. Türkiyə mətbuatının yazdığına inansaq, Atanın belə qəfil ayrılığının səbəbi “İstanbul BŞ”dən təklif almasıdı. Mütəxəssis başakşəhərlilərlə danışıqlar aparmaq üçün dünən İstanbula yollanıb.