Ötən mövsümü 3-cü pillədə tamamlayan və kubokda finala qədər irəliləyən “Trabzonspor”la bağlı yeni xəbərlər var. Öncə komandanın məşqçilər korpusunda dəyişikliklər baş verdiyini vurğulayaq.

“Football-plus.az” xəbər verir ki, belə ki, Egemen Korkmaz və Mustafa Sarp srağagün gözlənilmədən istefa verdi. Daha öncə bu klubda futbolçu kimi də çıxış etmiş Egemen 2020-ci ildən məşqçilər korpusuna daxil idi. O, açıqlamasında “Trabzonspor”a uğurlar arzulayaraq bundan sonra karyerasına baş məşqçi kimi davam etmək istədiyini deyib. Amma şayiələrə inansaq, Korkmazın maaşının yüksək olması klubda birmənalı qarşılanmırdı. Bu üzdən o, ayrılmaq qərarına gəlib. Sarpın istefası isə sürpriz olmadı. Çünki onu kluba məhz Egemen gətirmişdi. Baş məşqçi Abdulla Avcı da onların hər ikisinə kluba xidmətlərinə görə təşəkkür edib. Türkiyə mətbuatının yazdığına inansaq, artıq onları əvəzləyəcək yeni məşqçilər bəllidi. Onlardan biri son dönəmlərdə “Beşiktaş”dakı işi ilə tanınan Öndər Karavəlidi. Digər ismin isə ya Erol Can, ya da Hakan Özgür olacağı gözlənilir. Erol Can əvvəllər də “Trabzonspor”un məşqşilər korpusunda çalışıb. Rəsmi açıqlamanın qısa müddət ərzində veriləcəyi gözlənilir.

Transfer dönəminə isə qaradənizlilər çox sürətli və iddialı daxil olub. Komanda əvvəlcə sabiq futbolçusu, fanatların sevimlisi Entoni Nvakaemeni heyətinə cəlb edib. Nigeriyalı vingerlə “1+1” illik müqavilə imzalanıb. 35 yaşlı futbolçu daha öncə 2018-22-ci illərdə trabzonluların şərəfini qoruyaraq 145 rəsmi oyunda 47 qol, 35 məhsuldar ötürməlik performans sərgiləyib və biri çempionluq olmaqla 3 titul qazanıb. O, son iki mövsümü Səudiyyə Ərəbistanının təmsilçisi “Əl-Fayha”da keçirmişdi. Nvakaemedən başqa daha 4 futbolçu – Ozan Tufan, Borna Barişiç, Con Lundstram və Denis Draquşun da keçidi tamamlanmaq üzrədi. İngiltərəli yarımmüdafiəçi Lunstram ilə xorvatiyalı sol cinah müdafiəçisi Barişiç artıq Türkiyəyə gəlib. Bu iki futbolçu dünən İstanbulda tibbi müayinədən keçiriləndən sonra Trabzona ayaq basıb. Nvakaeme ilə Ozanın da qısa müddət ərzində tibbi müayinədən keçəcəyi gözlənilir. Xatırladaq ki, “Bursaspor”un yetirməsi olan və uzun illər “Fənərbaxça”da top qovan Ozan son iki mövsümdə “Hall Siti”nin şərəfini qorumuşdu. Bu arada onun sosial şəbəkələrdəki səhifələrində “Fənərbaxça”ya və “şike” mövzusuna dair bəzi paylaşımlarını silməsi diqqəti çəkib. Ötən mövsüm “Qaziantep”in heyətində superliqada 14 qol vuran Denis Draquş isə “Trabzonspor”un hazırlığına bir qədər gec qoşulacaq. Çünki 25 yaşlı forvard hazırda AÇ-2024-də mübarizə aparan Rumıniya yığmasının düşərgəsindədi.