“Heç kim düşünməsin ki, qaçıb gizlənmişəm” – Niftəliyevin “dili açıldı”
“Mingəçevir”də mövsümün əvvəlində və ilin sonunda yaşanan hadisələrlə bağlı silsilə xəbərlər yaymışıq.
Xatırladaq ki, sentyabrda 6 futbolçu haqsızlıqla üzləşib. Onlar Muxtar Nəzərli ilə Mövlan Kərimovun transferinin reallaşması üçün lazım olan məbləğin tapılması üçün komandadan uzaqlaşdırılıb. İndi isə həm adı çəkilənlərin, həm də Xəyal Muradov, Xəyal Xudaverdiyev, Tural Məmmədzadə, Fuad Əhmədov, Elnur Mirzəyev və Elnur Bayramovun adı danışılmış oyunlarda hallanır.
Təbii ki, gündəmdə olan mövzular yetərincə ciddidi. Bu ərəfədə baş məşqçi Ədəhim Niftəliyevlə yolların ayrılması da ağla xeyli sual gətirir. Hər halda, o, son hadisələrlə bağlı fikirlərini bölüşə bilər ki, ictimaiyyət müəyyən məsələlərə aydınlıq gətirə bilsin.
Cümə günündən, daha doğrusu, dekabrın 27-dən bəri qeyd olunanlar haqda fikirlərini öyrənmək məqsədilə Ədəhim bəylə əlaqə yaratmağa çalışırdıq. Nəhayət zəngləri və mesajları cavabsız qoyan məşqçi dilə gəldi:
“Futbol+”ə böyük hörmətim var. Məni zənglərə, mesajlara cavab verməyən biri kimi tanımağınızı istəməzdim. Onu deyə bilərəm ki, “Mingəçevir”dən istefa verib ayrılmışam. Vallah, çantamı yığıb komandadan getmişəm. İndi Bakıdayam. Ayrılığımdan sonra başverənlər haqda hansısa məlumatım yoxdu. Bu məsələlərlə müvafiq qurumlar məşğul olur. Heç kim düşünməsin ki, qaçıb gizlənmişəm. Nə olubsa, mənə heç bir aidiyyatı yoxdu”.
KƏNAN BAHADIR
