Xəbər verdiyimiz kimi, “Qarabağ” Çempionlar Liqası üçün sifariş ərizəsində dəyişiklik etdi.

Ciddi zədə səbəbindən bu il meydana çıxa bilməyəcəyi dəqiqləşən Kadi Borges Xoni Montiellə əvəzləndi. İspaniyalı futbolçuya indiyə qədər cəmi 1 dəqiqə forma şansı verən Qurban Qurbanov onu “Sumqayıt”la oyunda (4:2) start heyətində meydana buraxdı. 70 dəqiqə oynayandan sonra Marko Yankoviçlə əvəzlənən yarımmüdafiəçi “Mehdi Hüseynzadə”də özünü yaxşı tərəfdən göstərdi. O, Toral Bayramovun 42-ci dəqiqədə vurduğu qolun ötürməsini verdi, rəqibin azlıqda qalmasına səbəbkar oldu. Daha doğrusu, Rayan Senhadji məhz qol vurmağa çalışan Montielə qarşı kobud oyuna görə ikinci “sarı”dan qırmızı vərəqə aldı və meydanı tərk etdi.

Qeyd olunanlara əsasən, “10 nömrə”nin “köhlən atlar”dakı ilk çətin sınağından üzüağ çıxdığını demək mümkündü. Ancaq hələ əsas iş qabaqdadı. Heç şübhəsiz, söhbət “Qarabağ”ın Çempionlar Liqasının 5-ci turu çərçivəsində Neapolda “Napoli”yə qarşı keçirəcəyi oyundan gedir. Bəli, Qurban Qurbanovun Montielə start heyətində şans verəcəyini düşünmək olmaz. Hər halda, bunun üçün vaxt lazımdı. Ancaq Xoninin özünü sübut etmək istəyi göz önündədi. O başqa məsələ ki, sükanı daim belə saxlamaq lazımdı!

Bəlkə də Montiel qısa vaxtda “Qarabağ”ın aparıcı oyunçularından birinə çevriləcək. Düzdü, Abdulla Zubir olmaq çox çətindi, ancaq Leandro Andrade, Marko Yankoviç olmaq mümkündü. Və ya ən azı Toral Bayramov...

KƏNAN BAHADIR