Türkiyədə hakimlərlə başlayan və futbolçularla davam edən oyunlara pul qoyuluşu qalmaqalı bitməmiş növbəti bir şok ortaya çıxıb.

"Football-plus.az" xəbər verir ki, 2023-cü ilin dekabrın 24-də 1-ci liqanın 17-ci turu çərçivəsində oynanılan və ''Ümraniyəspor''un evdə ''Girəsunspor'' 2:1 məğlub etdiyi qarşılaşmanın nəticəsinin əvvəlcədən müəyyənləşdirildiyi məlum olub. Bu satılmış oyunla bağlı şok detalları iş adamı Cüneyt Semirli açıqlayıb. O özü də bu oyuna küllü miqdarda pul qoyuluşu edib. Semirli İstanbul Cümhuriyyət Prokurorluğuna müraciət edərək peşman olduğunu bildirib və bütün detalları açıqlayıb.

Onun sözlərinə görə 2023-cü ilin dekabrın 20-də Adanada bukmeker kontoru işlədən köhnə tanışı Ümit Kaya tərəfindən ''vatsapp''ına mesaj gəlib. Kaya mesajda iş adamına ''Girəsunspor''lu futbolçuları pulla satın ala biləcəyi barədə məlumat verib və onlar dekabrın 23-də, yəni oyundan bir gün öncə İstanbulda görüşüblər. Ümit Kaya ''Adanaspor''un sabiq futbolçusu və menecer Koray Şanlı, eləcə də Cenk adlı bir şəxslə əlbir olaraq bu işi təşkil edə biləcəyinə Semirlini inandırıb. Axşam saatlarında onlar ''Girəsunspor''un qaldığı otelə yollanıblar. Ümit Kaya ilə Cüneyt Semirli həmin oteldə bir otaq tutublar. Koray Şanlı isə futbolçular tərəfindən tanınacağından çəkinərək otelə gəlməyib.

Prokurorluğun əldə etdiyi məlumata görə bu ikili otaq tutduqdan təxminən yarım saat sonra ora ''Girəsunspor''un futbolçusu Faruk Can Gənç gəlib. Koray Şanlı da görüntülü zəng vuraraq ''danışıqlarda'' iştirak edib. Anlaşmanın detalları müzakirə edildikdən sonra futbolçuya 20 min dollar nəğd pul verilib! Daha sonra Cüneyt Semirli Ümit Kayanın məsləhəti ilə bir neçə qeyri qanuni xarici bukmeker saytlarında ''Ümraniyəspor''un qələbəsinə küllü miqdarda pul atıb. Eləcə də Ümit Kaya öz işlətdiyi bukmeker kontorunda ''Ümraniyəspor''un qələbəsinə böyük miqdarda pul qoyub.

Qeyd edək ki, Türkiyə Futbol Federasiyası tərəfindən noyabrın 13-də 102 futbolçuya pul qoyuluşu üzündən müxtəlif cəzalar verildiyi açıqlanmışdı. Həmin 102 oyunçu arasında Faruk Can Gənç də var. O, 3 aylığa futboldan kənarlaşdırılıb. Ancaq bu yeni faktların ortaya çıxmasından sonra bu futbolçunu qat-qat ciddi cəzalar gözləyir.