İstanbulda şok məğlubiyyət - ''Qalatasaray'' Belçika klubları ilə bacarmır

Çempionlar Liqasında əsas mərhələnin 5-ci turunda İstanbulda iki ölkə çempionu - ''Qalatasaray'' və ''Yunion'' üz-üzə gəldi.

"Football-plus.az" xəbər verir ki, son 3 turda ''Liverpul'', ''Bude/Qlimt'' və ''Ayaks'' üzərində parlaq qələbələr qazanan İstanbul nəhəngi bu görüşdə də aşkar favorit sayılırdı. Amma əsas qol silahı Viktor Osimhenin xidmətindən zədə üzündən faydalana bilməyən ''Cim-Bom'' ümidləri doğrultmadı. Okan Burukun komandası nə hücumda, nə də müdafiədə gözlənilən oyunu sərgiləyə bildi.

57-ci dəqiqədə Promis Davidin vurduğu qol oyunda oyunda yeganə oldu və ''Yunion'' minimal hesablı sürpriz qələbə qazandı. ''Qalatasaray'' yenə Osimhensiz uğurlu nəticə əldə edə bilmədi. 1-ci turda Frankfurt səfərində də komanda Osimhensiz oynamış və 1:5 hesabı ilə uduzmuşdu.

Xatırladaq ki, nigeriyalı forvard avrokuboklarda oynadığı son 8 matçın hamısında qol vurub. Ümümiyyətlə, ''Qalatasaray''ın Belçika klublarına qarşı sindrom yaşaması diqqət çəkir. ''Sarı-qırmızılar'' tarixi boyu Belçika təmsilçisinə qarşı keçirdiyi 9-cu oyunda da qələbəyə həsrət qaldı (4 heç-heçə, 5 məğlubiyyət)!

''Qalatasaray''ın doğma meydanda 33 rəsmi oyunluq məğlubiyyətsiz seriyası da başa çatdı. Komanda fanatları önündə sonuncu dəfə ötən ilin avqustunda, ÇL-in təsnifatının ''Yanq Boyz''la cavab oyununda uduzmuşdu (0:1). O qarşılaşma eyni zamanda ''aslan''ın avrokuboklarda qol vura bilmədiyi son oyun idi və 14 matçlıq bu seriya da başa çatdı.

Daha bir diqqətçəkən məqam Okan Burukun cəmi 1 əvəzetmədən istifadə etməsi oldu. 53-cü dəqiqədə İsmail Yakobsun yerinə Arda Ünyay oyuna daxil oldu. Gənc müdafiəçi 80 və 89-cu dəqiqələrdə iki sarı vərəqə alaraq komandasını son anlarda azlıqda qoydu.

''Qalatasaray''ın ÇL-də yalnız bir dəyişiklikdən istifadə etdiyi son qarşılaşmanı 2002-ci ildə ''Liverpul''a qarşı keçirmişdi.