Bu gün saat 00.00-da “Napoli”nin qonağı olacaq “Qarabağ” dünən Bakı vaxtıyla saat 22.30-da “Dieqo Maradona” stadionunda məşqə çıxıb. Komanda bununla ÇL-nin liqa mərhələsinin 5-ci tur matçına hazırlığı başa vurub.

Bununla belə, oyunun keçiriləcəyi şəhərdə - Neapolda hava şəraitinin yağmurlu olduğu, güclü küləyin əsdiyi haqda xəbərlər var. Hətta iş o həddə çatıb ki, İtaliya mətbuatı matçın təxirə salına biləcəyi haqda məlumat yayıb.

Bəs, “Qarabağ”ın düşərgəsində durum necədi? Son məşqdə zədələnən futbolçu olub, ya yox?

Klubun mətbuat xidmətindən “Football-plus.az”a verilən məlumata görə, hava şəraitinin oyunun başlayacağı vaxta qədər yaxşılaşacağı gözlənilir. Həmçinin son məşqlə bağlı bəd xəbər yoxdu. Komanda oyuna tam hazırdı. Qısası, hər şey qaydasındadı. Tribunalarda 50 min civarında azarkeş olacaq.

Qaldı azı bir xal qazanmaq! Bunun üçün də İtaliyanı şoka salmaq, “Napoli”ni sözün əsl mənasında diz çökdürmək lazımdı.

Haydi, “Qarabağ”, irəli!

KƏNAN BAHADIR