Nə AFFA danışır, nə klub rəhbərliyi, nə də Niftəliyev... - bəs oyunlar danışılırmı?
Danışılmış oyunlar... Bunu həm də futbolun çirkli üzü adlandırsaq, yanılmarıq. Biz hələ belə qorxunc məsələ üzündən “Şamaxı” ilə bağlı aparılan araşdırmaların cavabını gözləyirdik ki, ortaya “Mingəçevir”lə əlaqədar iddialar atıldı.
Daha doğrusu dekabrın 20-də “sportinfo.az” saytı məlumat yaydı ki, UEFA Azərbaycana məktub göndərib. Avropa futbol qurumu həmin məktubda AFFA-nı 1-ci liqayla bağlı bəzi yeni bigilərlə tanış edib. UEFA aşağı liqanın cari mövsümündə keçirilən 10-a yaxın oyunun nəticəsinin şübhəli olduğunu qeyd edib. Burda adı ən çox çəkilən komanda isə “Mingəçevir”di.
Deyəsən, “nur şəhəri”nin zülmət yaşamasında maraqlı şəxslər var - bu öz yerində. Bəs komandada nə yaşanıb? Belə ki, UEFA-nın daxilində fəaliyyət göstərən araşdırma qurumu müxtəlif qanuni və qeyri-qanuni bukmeker kontorlarından məlumat toplayıb. Nəticədə məlum olub ki, “Mingəçevir”in məğlubiyyətlərinə böyük məbləğdə mərc edilib. Bilindiyi kimi, komanda son 10 turda mümkün 18 xaldan altısını toplaya bilib. SOCAR-ın sabiq funksioneri Adnan Əhmədzadənin himayəsinə götürmək istədiyi komanda bu nəticə ilə sonuncu - 10-cu pillədədi. Məhz bu məqam şübhələri bir qədər də artırmağa əsas verir...
Ardınca məsələylə bağlı daha dəhşətli xəbərlər dərc edildi. Məlum oldu ki, “Mingəçevir”in yeddi futbolçusu saxlanılıb. Onlar hüquq-mühafizə orqanlarının əməkdaşları tərəfindən araşdırmaya cəlb olunub. Hadisə komandadaxili iclasdan sonra baş verib. Oyunçular elə həmin toplantının ardından Mingəçevirdən Bakıya gətirilib. Söhbət Mövlan Kərimov, Xəyal Muradov, Xəyal Xudaverdiyev, Tural Məmmədzadə, Muxtar Nəzərli, Fuad Əhmədov və Elnur Mirzəyevdən gedir. Təbii ki, həmin futbolçularla əlaqə saxlamağa çalışdıq. Lakin cəhdlərimiz fayda vermədi. Elə komandanın bu həftə yollarını ayırdığı baş məşqçisi Ədəhim Niftəliyev də zəngləri cavabsız qoydu. O başqa məsələ ki, mütəxəssis “Futbol+”ə açıqlamasında klubdan rəsmi şəkildə ayrılmadığını, rəhbərlik isə müqaviləyə rəsmən xitam verildiyini deyib...
Mövzuya qayıdaq. Göründüyü kimi məsələ yetərincə ciddidi. Böyük ehtimalla yaxın günlərdə həm “Şamaxı”, həm də “Mingəçevir” ilə bağlı araşdırma başa çatacaq və ağla qaranı seçmək mümkün olacaq. Biz isə başverənlərlə bağlı klubun İdarə Heyətinin sədri Nurlan Əhmədovu danışdırmağa çalışdıq:
“Bütün bu xəbərlərlə bağlı onu deyə bilərəm ki, hansısa məlumat üçün AFFA-ya müraciət edin. Bizim heç nədən xəbərimiz yoxdu. Hər şey bir anda baş verdi. Gözlənilməz hadisələr yaşandı. Biz məlumatsızıq”.
Bəs AFFA nə deyir? Qurumun Mətbuat və İctimaiyyətlə Əlaqələr Departamentinin rəhbəri Elnur Məmmədlinin açıqlaması:
“AFFA bu məsələlərdə daim sərt mövqe tutub və bundan sonra da oyunların manipulyasiya edilməsinə qarşı ciddi mübarizə aparacaq. Bəli, dediyiniz məsələdən xəbərdarıq. Sadəcə, hazırda araşdırma getdiyindən geniş açıqlama verə bilməyəcəyik. Araşdırma yekunlaşdıqdan sonra ictimaiyyətə ətraflı məlumat veriləcək”.
Gözləyək...
KƏNAN BAHADIR
Digər xəbərlər
