“Həmin ərəfədə 6 futbolçu komandadan uzaqlaşdırıldı. Bunlar Toğrul Məhəmmədəliyev, Elçin Abdullayev, Nihad Xəlilli, Nicat Məmmədli, Elvin Əlizadə və Orxan Əlibalayevdi. Hadisə “transfer pəncərəsi”nin bağlanmasına bir gün qalmış baş verdi. Hətta bu futbolçulardan bəziləriylə hələ bir neçə gün əvvəl müqavilə imzalanmışdı. Qərar isə həmin dövrdə iş başında olan məşqçilər korpusu tərəfindən təsdiqləndi. Yəni Ədəhim Niftəliyev və köməkçiləri iki futbolçunun – Muxtar Nəzərli və Mövlan Kərimovun transferinin reallaşdırılmasına nail ola bilmək üçün həmin mingəçevirli oyunçularla müqaviləyə xitam verilməsini təmin etdi. Belə izah etdilər ki, bu futbolçulara maaş vermək üçün yetərli maddi gücümüz yoxdu. Halbuki onlar 500-600 manat civarında maaşa razılaşmışdılar. Muxtar və Mövlan isə hərəyə 1500 manat alacaqdı. Hələ onların kirayə qaldığı evlərin xərclərini də klub qarşılayacaqdı. Hadisə mingəçevirlilərin ciddi etirazına səbəb oldu. Nə qədər desək də, qərarlarından dönmədilər. Bu gün eşidirik ki, həmin futbolçuların adı danışılmış oyunlarda hallanır...”