Məlumdu ki, “Qarabağ” Neapoldan xalla qayıtsa, liqa mərhələsini ilk “24-lük”də bitirmək ehtimalını böyük ölçüdə artıracaq. Bu səbəbdən tribunalar və komandaların performansıyla bağlı durumla yanaşı, hakim idarəçiliyi də ön planda olacaq.

Əlbəttə, ədalət təmsilçisindən yeganə istəyimiz “köhlən atlar”ın haqqının yeyilməməsi, tapdanmamasıdı. Bu mövzuda acı təcrübənin də olduğunu nəzərə alsaq, baş hakim Şimon Marçinyakı tanımağın vaxtı çatıb. O başqa məsələ ki, əslində polşalı referini tanıyırıq. Amma bu haqda bir qədər sonra...

Şimon Marçinyak... 44 yaşlı referinin təcrübəsiylə bağlı irəli-geri danışmaq bizə yaraşmaz. Axı o, indiyə qədər Polşanın elitasında 415 matç idarə edib, bu oyunlarda futbolçuları 1676 sarı, 99 qırmızı vərəqə ilə üzüb. Çempionlar Liqasının əsas mərhələsində 58 oyun idarə edən ədalət təmsilçisi haqda daha çox informasiya əldə etməkdə fayda var. Zarafat deyil, Marçinyak 2011-ci ildən bəri FİFA referisi kimi fəaliyyət göstərir. O, avrokuboklarda yalnız Konfrans Liqasının təsnifat mərhələsində iş başında olmayıb. Bununla belə, Marçinyak dünya, Avropa çempionatları, Klublararası Dünya Çempionatı, Millətlər Liqası kimi turnirlərdə baş hakim olub. O, beynəlxalq yoldaşlıq oyunlarında da iş başında görünüb. Təbii ki, “fit sahibi” karyerasının zirvəsinə DÇ-2022-nin finalını - Argentina – Fransa (3:3, p. – 4:2) matçını idarə etməklə çatıb.

Xatırladaq ki, Marçinyak həmin görüşdəki idarəçiliyinə görə Fransanın məşhur “Ekip” nəşri tərəfindən ciddi təzyiqə məruz qalmış, qarşı tərəfi “futbolda hər şeyə nöqtə-vergülünə qədər riayət etmək olmur. Ən önəmli məqam oyunun ruhunu qorumaqdı. Dünyada 150 səhifəlik qaydalar kitabını əzbər bilən yüzlərlə hakim, amma mundialın finalını idarə etməyə qadir olan cəmi bir neçə ədalət təmsilçisi var” sözləriylə susdurmuşdu.

Marçinyak DÇ-2012-nin seçmə mərhələsinin Portuqaliya - Azərbaycan görüşünü (3:0) də idarə edib. 2013-cü ildə isə “Qarabağ”ın Avropa Liqasının pley-off mərhələsindəki məğlubiyyətinə şahidlik edib. O, “köhlən atlar”ın evdə “Ayntraxt”a uduzduğu (0:2) oyunda iş başında olub. “Fit sahibi”ylə “Qarabağ” arasında daha bir bağ var. Belə ki, o, “köhlən atlar”ın Çempionlar Liqasının 2022/23 mövsümünün 1-ci təsnifat mərhələsi çərçivəsində Bakıda Polşa “Lex”ini darmadağın etdiyi (5:1) oyunla bağlı “instaqram” səhifəsində bu ifadələri işlətmişdi:

Ümumiyyətlə, Marçinyak karyerası boyunca 702 matç idarə edib. Bu qarşılaşmalarda 2930 sarı, 157 qırmızı vərəqə göstərib. Əlbəttə, statistika bu gecə dəyişəcək. Ümid edirik ki, referinin hər addımı ədalət naminə olacaq. Ən azı Marçinyak “Qarabağ”dan “Lex”in qisasını almağa çalışmayacaq...

KƏNAN BAHADIR